AMSTERDAM – Segun Rijksinstituut voor Volksgezondheid en Milieu (RIVM) diadomingo Hulanda a conta cu 101 persona mas cu a fayece di coronavirus, asina a yega na un total di 1867 persona. Tambe 260 persona mas cu a wordo interna na hospital, un aumento chikito compara cu e dia anterior, esaki a yega na un total di 7135 persona interna den hospital.
Den e ultimo 24 oranan, 952 persona mas a test positivo pa cu e coronavirus y a yega na un total di 18.803 persona positivo.
E cantidad di casonan di fayecimento y di personanan interna, no ta cuadra cu e realidad. Hopi biaha ta dura un of mas dia pa e informacion di pashent interna of persona cu fayece wordo pasa pa RIVM. Tambe tin hendenan cu ta muri di e virus sin cu a wordo getest positivo, esakinan ta falta den e statistieknan.
Dia 24 di maart tabata e dia cu mas persona cu a wordo interna den hospital un cantidad di 554 pashent.
Dia 31 di maart tabata e dia mas scur di e pandemia na Hulanda un total di 149 persona infecta a fayece.
Mayoria di personanan cu a fayece di Covid-19 ta riba e edad di 70 aña, sporadicamente un persona mas hoben ta fayece. E persona mas hoben cu a fayece di coronavirus na Hulanda te na momentonan aki, tabata entre 25 cu 29 aña, pero e persona aki tabata den e grupo di riesgo, pa motibo cu e tabata un persoan cu tabata sufri di un of otro malesa caba. Sigui pa un persona den su trinta y 7 persona di entre cuarenta cu cincuenta aña.
Mayoria di personanan cu ta wordo interna den hospital ta hendenan di edad, leu a leu tin excepcion. Na comienso di e brote di virus a registra oficialmente 30 mucha entre 0 cu 4 aña cu tabata contagia cu e virus, a wordo interna. Di tur e pashentnan cu a wordo interna pa cu e virus aki, solamente 0.8% ta bou di 20 aña.