Home » Parlamentario Arthur Dowers: Gobierno ta papia di retiro di trahadonan pero ta regala CITGO miyones

Parlamentario Arthur Dowers: Gobierno ta papia di retiro di trahadonan pero ta regala CITGO miyones

by Admin
0 comment 64 views

For momento cu Prome Minister Evelyn Wever Croes a huramenta, su persona y su gabinete a mustra un set di gobernantenan bruha cu no sa kico nan tin cu haci awor cu nan ta den gobierno.
Miembro di fraccion di AVP, Arthur Dowers ta mustra cu den e prome dianan na mando di e pais, ya caba Prome Minister a bin dilanti y anuncia cu su gobierno lo bay aumenta BBO formalmente y lo introduci varios otro medida pa haya placa den caha.
“For di e prome simannan caba, Evelyn Wever Croes y su grupo a dicidi di traiciona pueblo di Aruba pero mas ainda su votadonan, ya cu el a priminti tur cas cu el a drenta den pueblo durante di campaña, cu su partido tin solucion pa e situacion financiero y cu e lo no introduci ningun medida caminda lo ranca placa for di cartera di pueblo.
Evelyn su gobierno tin casi tres aña rancando placa for di cartera di pueblo, engañando tur hende pakico e tin cu haci esaki y sin duna pueblo ningun cen extra bek.
Awor cu e crisis di corona virus a bati na nos porta, Prome Minister Evelyn ta hungando rol di santo, papiando bunita, papiando cu e ta reglando tur cos cu Hulanda pa haya prestamo na un interes hopi abou.
Sinembargo diabierna ultimo Hulanda a informa Prome Minister Evelyn cu nan no ta confia den su palabra, nan no ta mira con e por bay paga e placa aki bek y kier mira con e lo bay haci esaki den futuro loke ta pone Evelyn den un situacion cu nunca el a haci.
E contesta di Hulanda ta mustra bon cla cu ni Hulanda no tin confiansa den Evelyn y su Gobierno, ya cu no ta prome bes cu ta papia cu su persona y su Minister di Finansa, cu nan tin cu baha gasto di personal loke nan no a bin ta haciendo.
Awor nos por a scucha Prome Minister papia na television, papia cu pueblo bisando cu trahadonan di gobierno tin cu compronde cu nan tin cu bay entrega, cu nan tin cu compronde cu nan tambe tin cu haci sacrificio y nan tambe tin cu bay entrega.
Ya caba a cuminsa papia di beneficionan cu lo bay wordo anula, di otro aspectonan salarial caminda e trahado di gobierno lo mira cambionan serio den su entrada pero ni algun dia despues, Prome Minister Evelyn Wever Croes ta bin dilanti y bisa pueblo, cu el a yega na una reglo cu CITGO pa e bay y cu nan tin cu paga un suma di 16 miyon di dollar.
Un suma cu ta menos cu mita di loke ta para den e contract cu gabinete Mike Eman a firma cu CITGO caminda si e compania aki no cumpli, e lo tin cu paga 325 miyon na pais Aruba pa motibo di a bay den default.
Pues un banda bo ta bisa trahadonan publico pa prepara pasobra nan tin cu entrega den tempo di crisis aki pero ta bira hunga pa Sinterklaas dunando un compania asina grandi un regalo di miyones y miyones di dollar.
Algo cu simplemente no por wordo hustifica y caminda hasta nos por bisa cu gobierno tin cu exenora un grupo grandi den nos comunidad pa loke ta nan debe di belasting mescos cu CITGO ta wordo trata.
Ta bon mi menciona tambe cu aki pueblo tin un gobierno di MEPPORRED cu a costa pais Aruba mas cu 7 miyon na biahamento rond mundo pero ningun momento kier papia di no biaha mas den proximo lunanan pero e trahado di gobierno si, tin cu bay sacrifica.
Prome Minister Evelyn den 139 dia den gobernacion a costa pais 1.1 miyon pa gastonan di biahe, Minister Chris Romero a biaha mas cu 200 dia rond mundo pa e suma di1.5 miyon florin cu no ta wega.
Minister Glenbert Croes tambe a yega e plafond di un miyon pa loke ta gastonandi biahamento caminda el a pasa mas du 200 dia biahando y Minister di Finansa Xiomara Ruiz Maduro a recore mundo pa mas cu 120 dia y a supera e costo di 900 mil florin na gastonan di biahamento.
Minister Rudy Lampe, e minister cu mas a mira su decisionnan wordo “terug gefloten” a costa pueblo mas cu 700 mil florin na biahamento mientras cu Minister di Husticia Andin Bikker tambe ta cerca di mey miyon di florin cu mas di 400 mil florin na costo di biahamento.
Tur esaki pa colmo e minister di turismo mes cu mester a biaha mas cu tur di e gabinete aki, a costa pueblo alrededor di 400 mil florin na biahamento.
Aki Prome Minister Evelyn tin cu bin cuminsa splica trahadonan publico, cu su gabinete lo no biaha mas cu nan lo no sigui gasta miyones di florin na biahamento, cu lo no duna CITGO miyones di dollar di regalo, anto ta pidi trahadonan publico pa entrega parti di nan beneficionan, parti di nan salario,” Parlamentario Arthur Dowers a declara.

\

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio