E medidanan ku gobièrnua tuma pa por limitá e krísis di covid-19 ta drástiko. Esaki ta trese kuné ku tin hopi reakshon bou di e populashon, entre otro riba medionan sosial. Aki na Kòrsou nos ta biba den un demokrasia liber den kua en prinsipio un i tur por papia i skibi loke e ke. E derecho fundamental aki ta konosí komo e derecho riba libertat di ekspreshon. Sinembargo tin algun regla mará na ehersementu di e derecho aki.
Un di e reglanan aki ta stipulá den artíkulo 2:49 di kódigo penal, den kua ta stipulá instigamentu (‘opruiing’) komo un echo kastigabel. Instigamentu ta nifiká básikamente – pa den arena públiko stimulá hende pa kometé un echo kastigabel kontra di outoridat públiko. Por lo tantu por kalifiká ponementu di mensahe riba Facebook òf otro medio sosial den kua ta motivá otronan pa kometé un echo kastigabel kontra di un outoridat públliko komo instigamentu i esaki ta un echo kastigabel. Ministerio Públiko ke kòrda un i tur ku e tin e outoridat pa persiguí penalmemente personanan ku ta hasi komentarionan ku por konsiderá komo instigashon riba medionan sosial.