Fraccion di AVP den Parlamento a entraga un carta pa Presidente di Parlamento expresando nan preocupacion cu Gobierno di Aruba ta malusa e situacion rond di e crisis di corona pa haya un aprobacion di Staten cu e fin pa termina e acuerdonan firma cu CITGO, unda Land Aruba ta tuma over e responsabilidad completo y sin haña compensacion pa e falta di cumplimento di falta di CITGO. “Nos a manda un carta identico pa Gobernador di Aruba, como tambe gremionan sindical y comercial na Aruba,” lider di fraccion, Sr. Marlon Sneek a informa. “Asina tur hende ta na altura di nos posicion pa loke ta trata e intencion nan di Gobierno.”
“Dor di exonera CITGO di tur su obligacionnan y hala un banda su responsabilidad e suma astronomico di US $175 miyon ta den wega. Un suma cu ta consisti principalmente di e placa exonera conforme acuerdonan na balor di US$150 miyon pa dañonan haci na Pais Aruba si yega na un finalisacion prome cu loke a keda acorda den acuerdonan firma na 2016,” e carta ta bisa.
Den su conseho Raad van Advies ta señala cu ningun caminda ta indica cua ta e interesnan financiero of comercial a wordo regla den e Acuerdo di Terminacion entre CITGO di Gobierno di Aruba, ni tampoco e balor di placa si ta trata un interes comercial. “Den tur esaki Gobierno ta pidi Parlamento pa dun’e un carte blanche pa yega na un acuerdo di terminacion cu CITGO na un balor di US$175 miyon sin cu acuerdo ta parti di e trayecto di legislacion,” segun fraccion di AVP.
Ta custumber cu ora cera acuerdonan cu ta di interes nacional of cu mester un acuerdo di Parlamento prome cu e ta legal, esakinan por lo menos ta wordo entrega na Parlamento pa e miembronan por studi’e. Esaki tabata e caso prome cu tratamento di e contractnan di CITGO na 2016. Den ambos caso ta duna un splicacion detaya y si mester tecnico encuanto e contenido y intencion di dicho acuerdonan.
Segun fraccion di AVP, Raad van Advies ademas a señala cu falta un limite na e aprobacion (machtiging) pidi y cu e acuerdo mes entre CITGO cu Gobierno di Aruba no ta forma parti di e ley, manera cu e tabata e caso den pasado. Loke cu Gobierno ta pidiendo simplemente ta ‘carte blanche’, mescos cu presupuesto 2020, contra tur principionan di un sistema democratico, seguridad huridico y bon gobernacion.