Leiden: Den un flat na Riebeeckhof na Leiden Noord, diabierna merdia a bin topa cu un curpa sin bida di un dama. E dama tabata biba den su cas cu su dos yiunan chikito. Hulpverlenersnan a nota cu nan no a tende nada mas di e dama aki y a dicidi di pasa na e cas.
E dama a duna lus 14 dia pasa di un yiu homber. Polis a cera e area cu lint y bisiñanan tabata para pafo, puntrando nan mes ta kiko lo por a pasa. Un team forenscio tabata na e sito y mientras nan ta haciendo investigacion, bisiñanan ta keda puntra” ma ta kiko por a pasa?”
Polis no ta dunando niun informacion, segun e bisiñanan e dama, mama di dos criatura ta den su trinta ney, e tabata biba su so cu su yiunan, e tabata un hende hopi cera. Un bisiña a conta cu prome cu merdia nan a scucha un grito duro for di e cas di e dama y despues a mira polis, ambulance, traumahelicopter riba e veld di bala patras di e cas, e helicopter a bay bek bashi.
Un rato despues aparentemente famia di e dama lo a yega, core drenta paden y sali bek na yoramento.
Niun hende no sa kiko exactamente a pasa, pero tur cos ta mustra den rumbo di un crimen. E defunto ta procedente di Eritrea. Mescos cu un cantidad di otro famianan vunerabel procedente di Eritrea nan ta ricibi guia y ayudo social. E dama no tin mucho tempo bibando na Hulanda.
Ela duna lus 2 siman pasa y e stichting Binnenvest cu a acompañe durante parto, no a tende nada mas di dje pa e ultimo 13 dianan.
E victima tabata tin hopi miedo di haya coronavirus y no tabata sali pafo di cas mes. E hulpverlener di Binnenvest a ripara cu ta durando mucho largo cu e no a tende nada di e dama y asina a dicidi di bay na e cas.
Na momento cu a descubri e dama morto den su cas, su dos yiunan a wordo hiba mesora cu ambulance pa hospital.
Vocero di polis no kier a bay den mucho detayes y a bisa cu e dos muchanan a wordo hiba hospital pa un control medico. Pero no kier a bay den mas detayes y ta bisa pa warda riba e investigacionnan forensico.