Home Politics ExPromer Minister Mike Eman “Nos mester ta  pioneronan pa etapa nobo...

ExPromer Minister Mike Eman “Nos mester ta  pioneronan pa etapa nobo di rescate, recuperacion, progreso”

SHARE

 

 

Den su discurso nacional dialuna anochi, ExPromer Minister mr Mike Eman a mustra riba e tempo nos dilanti, mustrando cu lo tin hopi sacrificio pero  na mes momento a enfatisa cu mester ta husto den esaki. 

“Nos lo mester para firme, pero semper cu humildes den utilisacion di poder.

Nos lo mester ta decisivo  pero pa e causa corecto.

Nos lo mester lucha uni pa e futuro di nos isla stima keda salba. 

Mucho decision controvercial y dudoso di gobierno hustamente den e teporada aki,  ta debilitando cualkier autoridad moral y confiansa c’un gobierno mester tin pa guia un pueblo den momentonan crucial asina.  

No ta momentonan pa repasa esakinan pero nan ta worde sinti den henter nos comuidad. Nos trahadonan, nos docentenan, nos profesionalnan, nos empresarionan, nos hobenan, nos mundo academico, den cada un di e sectornan aki tin dolornan grandi, preocupacion profundo cu e rumbo di nos Pais.

E reto nos dilanti ta mas grandi cu cualkier un instituto den nos Pais para riba su so por atende, carga y resolve,” mr Mike Eman a relata. 

 

ExPromer Minister Mike Eman a sigui mustra cu den e dianan aki el a intercambia y solicita conseho y nan miras tanto personal como  unda cu por di nan instituto, – cu Mediador Laboral, Anselmo Pontilius, Dirigente di FTA, Rudy Geerman, Dirigente di SPA, Jose Dirksz, Presidente di AHATA, Tisa Henriquez, Comerciante Satish Daryanani.

 

“Tur sea, di sector comercial of sindical, tin un preocupacion profundo cu locual ta spera nos ta un reto gigantesco cu lo tuma un tempo dificil pa supera. E mesun sonidonan di preocupacion mi por a lesa tambe di Comerciantenan Uni vocifera pa hoben empresarionan, Sr. Francis Saladin y Sr. Frans Ponson.

E crisis aki ta grandi, hopi complica, urgente y sin precedente. 

E ta bon cla cu pa e destino di nos pais y nos futuro generacion cu nos mester responde uni y cu un compromiso profundo pa supera e reto aki.

Laga nos realisa kico ta worde spera di cada un di nos. 

Laga wordo bisa di nos cu a enfrenta e momento crucial aki ..cu nos a responde y a supera e retonan di nos tempo. Nos mester ta e pioneronan pa un etapa nobo di rescate, recuperacion, progreso, di cambio, reformacion y renovacion.

E ehempelnan heroico di curashi for di pasado por difini e ingrediente aki, por sirbi como ehempel, por ofrece speransa, por provee inspiracion, pero nan no por duna curashi riba nan mes. Pa esaki cada un di nos mester wak den su alma pa hunto nos asumi nos responsabilidad.

 

Nos mester prepara cu nos hobennan profesional y tur nos miho hendenan e plan di recuperacion di Aruba.

Nos no por fiha simplemente riba crea e momento pa sigui cu “Business as usual”. Tin un oportunidad grandi tambe pa nos “reset y reboot” nos desaroyo social economico. Esaki pa mehora di biaha hopi tema cu pa añanan largo nos a considera un debilidad den nos desaroyo.

Tin un oportunidad pa repensa, “rethink” cosnan fundamental cu por bai haci Aruba den futuro un Pais hopi mas prospero, feliz y duradero. Un Pais cu oportunidad mas husto pa un y tur y cu instrumentonan pa tur iniciativa por haya un miho sosten pa alcansa metanan desea.

Un sociedad mas husto, cu un grado halto di harmonia y convivencia comunitario y cu ta respira un ambiente positivo y di optimismo pa alcansa lo mihor pa un y tur,” Ex Promer Minister Mike Eman a declara.