Apenas algun dia pasa e dos artistanan di Loredana (Romenia) y Zuna (Alemania) a debuta nan exito nobo titulo ‘Du Bist Mein’. E exito aki ta skirbi pa Jeon (Aruba) y den un tempo record a posiciona su mes na # 1 riba diferente plataformanan digital. Esaki ta e caso na e.o Austria, Suiza y Alemania.
Tabata na 2019 cu Jeon a encontra cu mes cu diferente artista na Paris unda cu e la produci y skirbi varios cancion. Un di nan tabata ‘Du Bist Mein’ cu ta nifica ‘Bo ta dimi’. Pa Jeon e tabata un honor pa por a skirbi e cancion den 2019 y dia 26 di Maart ultimo mundo completo a cera conoci cu ne.
Loredana ta un cantante / actriz y presentadora hopi popular di Romenia. E otro artista ta Zuna. Zuna ta un rapper aleman cu a nace na Libanon cu tambe ta goza di un popularidad grandi.
E artistanan a graba un video clip tambe cu ja caba den apenas algun dia tin mas di 5 miyon view. Tambe riba TikTOk cu ta un plataforma social digital hopi popular por mira mas di 1000 video graba usando e cancion aki.
Cu e logro aki nos por mira cu pa Jeon no tin ningun barrera den era actual di musica unda cu por confirma cu musica no conoce lenguahe.
Link: https://www.youtube.com/watch?v=6HYNLEeU1EQ