Home » Turtuga morto haya riba beach di ex Bushiri Hotel, a wordo hiba pa haci autopsia

Turtuga morto haya riba beach di ex Bushiri Hotel, a wordo hiba pa haci autopsia

by Admin
0 comment 224 views

Turtuga ta animalnan protegi y nos tur mester cuidanan, proteganan pa nan no bay den extinction.

Oranjestad: Dialuna den oranan di mainta polis a haya un informacion cu riba e beach dilanti di ex Bushiri Hotel, un pickup lo a coy un turtuga hinke den baki pickup y lo a bay cune. E persona cu a avisa polis a sigui e pickup aki, pero hopi liher a bin compronde cu e pickup ta pertenece na Turtugaruba Foundation.

Polis a bay acerca e personanan encarga cu e Fundacion, nan a splica polis cu nan a haya e informacion cu tin un turtuga morto riba e beach di Bushiri y como e fundacion responsabel cu ta traha boluntariamente pa protega e turtuganan rond y riba nos isla a bay mira mesora kiko lo por a pasa cu e turtuga.

Nos a papia cu e personanan encarga cu e fundacion Turtugaruba, nan a splica cu mirando e condicion cu e curpa di turtuga ta aden, nan ta constata cu no ta trata directamente di un crimen, pues cu un hende cu lo por a mata of desgracia e turtuga. Un otro causa visibel di morto di un turtuga, sa pasa cu nan ta pega den netnan di pisca y no por subi na superficie pa hala rosea y ta fayece.

E turtuga cu a wordo haya riba beach dilanti ex bushiri Hotel ta un Hawksbill y di pafo e ta mustra intacto, pa e motibo aki e fundacion a opta pa hib’e Veterinaire Dienst caminda mesora lo haci autopsia riba dje pa asina por detecta e causa di morto.

Segun e personanan encarga cu e fundacion a splicanos cu tin biaha lo por ta trata di plastic den lama, turtuga ta come jellyfish y sa confundi entre plastic cu un jellyfish y ora nan come saco of  di plastic esaki por ta fatal pa nan.


Arubanative.com ta keda enspera di e resultado di e autopsia di e turtuga, pa asina haya sa e causa exacto y nos lo publica esaki

Turtugaruba a wordo funda oficialmente na 2003, pero tabata activo caba for di 1993. Turtugaruba ta un fundacion pa yuda conserva turtuganan di lama y nan habitat, especialmente riba y rond di Aruba. Turtugaruba ta miembro di Wider Caribbean Sea Turtle Conservation Network.

Tur turtuganan di lama mundialmente ta den peliger di extinction, Aruba su beachnan a bira un lugar special pa neishinan di Leatherback, Hawksbill, Green Turtle y Loggerhead.

Tur aña durante e temporada di Maart te cu September e turtuganan ta subi riba beach pa traha nan neishi y pone nan webonan.

Durante e temporada aki boluntarionan ta busca riba beach unda tin neishi y ta laga pone baricada como protection pa e neishinan aki. E boluntarionan ta cuidanan pa niun hende no haci e neishinan daño. Tambe ora nan nace ta guianan pa nan bay direcion di lama, e turtuganan ta sigui e claridad di luna of di solo cu ta briya riba lama.

E boluntarionan ta extra atento e momento ey pa e turtuganan recien naci no bruha cu lusnan di caya, di hotel etc, y bay direccion contrario subi caminda, cu resultado fatal pa nan.

Na momento cu e turtuga subi tera pa traha su neishi y pone su webonan aden ta dura entre 60 pa 70 dia pa nan nace.
E temporada cu e turtuganan ta nace y sali for di nan neishi ta entre mei cu November.

 

Bo tabata sa:
Cu turtuganan di lama ta regresa riba nan beach natal pa traha nan neishi y pone webo
Cu turtuganan di lama ta usa claridad di naturalesa di luna of di solo cu ta briya riba lama pa guianan y hibanan na awa di lama
Cu Turtuganan di lama ta traha neishi y pone webo cada 2 pa 5 aña
Cu un den mil turtuga di lama cu nace, ta keda bibo y ta crece bira grandi.

Pa e motibonan aki nos mester protega nan, Cualke actividad of kiko cu mira riba beach of den lama cu tin di haber cu turtuga di lama, please raporta esaki mesora na polis of na 5929393.

Si bo ta desea di aporta na conservacion y protection di turtuganan di lama na Aruba, por haci un donacion na:
TurtugAruba
Aruba Bank
Accnt #4006684

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio