Den e crisis sin precedente aki, toch tin logro positivo pa nos studiantenan. Minister Lampe encarga cu educacion a caba di firma un acuerdo di cooperacion cu University of West Florida. Cu esaki nos studiantenan ta paga e in state tuition fee cu ta hopi mas favorabel cu e international fee. Nos a compronde cu tin hopi interes bao di nos studiantenan pa bai studia na University of West Florida.
Antes tabata casi imposibel financieramente pa nos studiantenan studia na Merca. Awor cu e tipo di acuerdonan aki nos studiantenan cu un Arubalening por studia na Merca. Nos ta mirando un cambio, cu mas studiante ta scoge pa studia na Merca en vez di bai Hulanda. Y e indice di exito ta hopi mas halto na Merca cu na Hulanda pa loke ta e prestacion di nos studiantenan. Pesei nos maneho ta pa yuda e hobennan aki logra un miho futuro.
Nos ta pidi encarecidamente tur hoben interesa pa bishita e website ea.aw pa risibi mas informacion con pa aplica pa e Arubalening y pa nan sigui cu nan tramite di inscripcion na University of West Florida. En bista cu pronto lo sera tur aplicashon pa aña 2020, mi ta conseha tur hoben cu ta interesa pa aplica pa e scholarship aki pa bai riba e website di UWF. Bai riba Latin American and Caribbean Scholarship y aplica via e LAC pa bin na remarca pa e in state tuition fee. E MOU firma ta duna 5 hoben arubiano e oportunidad pa por studia na UWF na un rate special igual na e rate di un residente di Florida.