Nota editorial: Aruba Native ta encarga su mes pa duna cobertura esencial di e lucha contra Coronavirus. Esaki ta nos responsabilidad periodistico pa asina mantene e pueblo di Aruba debidamente informa y educa riba con pa atende cu e crisis actual. Aruba Native ta basa su publicacionan riba informacion ricibi for di fuentenan oficial. Nos ta suplica nos lesadornan pa sigui recomendacionan for di fuentenan oficial, esnan local (p.e. DVG, Hospital…) y internacional (p.e. WHO, CDC..).
Cuminsando awe diadomingo 29 di maart a cuminsa cu e medida di seguridad ‘shelter-in-place’. Un di e poco excepcion cu ta permiti ciudadanonan di sali di cas ta pa haci compras na supermercado.
Haciendo compras durante e periodo aki di crisis di COVID-19 por ta un riesgo pa bo salud. Supermercadonan ta tumando hopi precaucion y medidanan pa preveni cu ta expone nan empleadonan o clientenan na e virus.
Nan ta percurando pa limpiensa mas frequente y extenso, nan ta poniendo hand sanitizer na entrada, ta preveni entrada pa gruponan grandi, empleadonan ta wordo duna handschoen y mondkapje, tambe tin cu a pone screen di plastic pa asina proteha nan caheranan.
Tur esaki ta duna e impresion cu tin un preocupacion grandi pa cu e virus, y cu esnan encarga cu e establecimentonan aki a tuma e responsabilidad di proteha nan empleadonan y clientenan. Mester nota si cu coronavirus ta keda un sorto di ‘menasa invisibel’.
Bishitando un establecimento cu ta kizas ricibi centenares di persona cada dia ta keda un risico. Den e publicacion aki nos ta bay menciona 5 manera cu por anda cu e tarea di haci compras den e temporada di crisis aki.
1. Tene 2 meter di distancia for di otro cliente y di e empleadonan di e establecimento
Teniendo distancia ta un dje poco formanan cu bo por proteha bo mes di e virus. Banda di laba man cu habon pa 20 seconde y no mishi bo cara (wowo, nanishi o boca) e ta un di e maneranan mas importante cu bo por proteha bo mes.
Tene pasenshi ora bo ta paden di e tienda. Tene distancia y warda bo turno pa coi algo for di reki, den freezer o frishider. Corda cu bo ta den contacto cu material (p.e. man di porta, garoshi, producto) cu otro hende a ya mishi cune. Ta importante pa no mishi bo cara tanten cu bo no a haya chens di laba man. Purba di minimisa e areanan cu bo lo mishi cune.
2. Bay haci compras bo so, no bay den grupo
Claro tin hende cu pa un o otro motibo no por bay haci compras nan so. Un ehempel di esaki ta mayornan cu kizas no por laga nan yiu chikito su so na cas. Pero ta importante pa purba haci lo maximo pa bay bo so haci compras.
Esaki lo reduci e cantidad di persona paden y ta hacie mas facil pa mantene distanciamento social. Corda cu pa e 5 dianan prome cu un persona desaroya sintoma di e virus, nan ta ya caba contagioso pa otro. Tene bo distancia.
3. Cumpra solamente lo mas esencial cu bo mester
Ta comprendibel cu personanan lo ta den panico y kier cumpra hasta mas cu nan mester en realidad. Djies e hecho aki ta hacie dificil pa otro por haya productonan cu nan mester. Tene cuenta cu tin mas persona cu tambe ta den necesidad.
Cumprando mas cu bo mester por causa tambe cu productonan lo bay vence y benta afor sin wordo uza. Esaki ta resulta den un desperdicio di cuminda cu sigur por a bay pa otronan den necesidad.
4. Respeta orario stipula pa nos grandinan o esnan mas vulnerabel shop
(Idealmente, esnan di un edad mas avansa o cu sistema inmunologico comprometi [p.e. pashent di cancer] ta haya cooperacion di nan famia o amistad pa trece compras pa nan.)
Super Food ta un ehempel di un supermercado cu a pone un orario special dedica na nan cliente 60+. Di 7:30 pa 9:30 hendenan di un edad mas avansa por trankil di nan bay haci compras. Ta pidi pa esnan cu no ta cay den e grupo aki respeta esaki y duna espacio pa e miembronan mas vulnerabel di nos comunidad haci nan compras.
5. Uza servicionan di delivery
Un fenomeno mas nobo ta cu por haci compras via algun servicio cu ta entrega esaki te na bo porta di cas. Un di e servicionan local di delivery ta Groceries to go y tin algun supermercado cu tambe ta provee e servicio di delivery. Menos hende riba caya y den tiendanan ta reduci e chens di transmision di COVID-19.
Si bo ta haci uzo di e sistema di delivery esaki ta reduci e cantidad di biaha cu bo mester sali di cas, pues bahando e riesgo di expone bo mes na e virus.
Pa finalisa, mester bisa cu e medidanan aki ta un di e formanan cu nos por proteha nos mes, nos sernan keri y hendenan den nos comunidad contra di e virus. E casonan di infeccion di COVID-19 a mustra di a crece rapidamente, y Gobierno di Aruba mester a tuma varios medida pa asina lucha contra di esaki.
Nos sistema medico tin un limit pa cuanto caso e por carga. Nos tur tin un parti importante pa hunga den e lucha contra coronavirus.