Entregamento di un concepto di ley/ Ley di Solidaridad di e fraccionnan di MEP Y Red na Parlamento
Oranjestad: Diabierna den oranan di mainta Sr. Rocco Tjon, di fraccion di MEP y Sr. Ricardo Croes di Fraccion di RED, a entrega un concepto di ley cerca Mr. Ady Thijsen, presidente di Parlamento di Aruba.
Rocco Tjon a splica pakiko a bin cu e concepto di ley aki, ela splica cu e concepto di ley aki ta pa reglamenta e rebaho entre otro e di salarionan di tanto parlamentarionan, ministernan y tambe di minister plenipotenciario.
Mirando e crisis cu nos ta den actualmente, gobierno pronto lo bay presenta esaki. E parlamentarionan aki a reuni cu algun consehero pa haya sa mas o menos kiko e calculacion lo ta pa e parlamentarionan y ministernan, abase di esaki a traha un concepto di ley. Salarionan, beneficionan di ministernan y parlamentarionan ta regla den ley y e unico forma pa cambia esaki ta por medio di un cambio di ley.
Esaki kemen cu parlamento den su totalidad lo bay entrega riba mey miyon florin e aña aki.
Fraccion di MEP y fraccion di RED a firma e concepto di ley aki y awe a entrega esaki na Presidente di Parlamento.
Parlamentario Ricardo Croes ” e hecho cu nos ta presenta e ley aki awe no ta abase di e reunion publico cu a caba di tuma lugar”
Pero nan tabata tin palabracion caba cu nan mester tuma medida den sector publico, dus ambtenarij, parlamento y ministernan.
Segun Ricardo Croes, e concepto di ley entrega awe ta uno necesario y no mil florin so pa 3 lunanan, pasobra esey no lo yega pa nada. Segun Ricardo Croes e poco mas cu mey miyon cu lo wordo entrega mes lo no yega, pero SI ta un gesto necesario.
Mr. Ady Thijsen ta hopi contento di ricibi e concepto di ley aki. Segun Ady Thijsen esaki ta mustra e seriedad cu parlamentarionan mester tin. Ady ta di acuerdo pa entrega paso tempo di 911 ela entrega 10% di su salario y e lo haci esaki atrobe.
Aki ta trata di un ley di iniciativa cu a wordo entrega y despues lo ta bay wordo trata y Parlamento lo meste bay vota riba dje.
Segun Rocco Tjon, cada parlamentario e aña aki ainda lo entrega 25 mil florin di nan entrada. No obstante ki momento nan trata e ley aki y vota riba dje. E ley di solidaridad aki lo drenta na vigor for di cuminsamento di April 2020.
