Home Local Tambe durante e dianan aki Telefon pa Hubentud ta sigui scucha nos...

Tambe durante e dianan aki Telefon pa Hubentud ta sigui scucha nos muchanan y hobennan

SHARE

Aruba completo ta pasando den momentonan hopi dificil pa loke ta trata Covid-19 (Coronavirus). Casi tur dia por bisa ta bin casonan confirma aserka. Personanan basta ora den cas, algun trabaonan tumando lugar for di cas, personanan perdiendo trabao, hobennan preocupa pa cu nan estudio y hopi preocupacion specialmente pa e gruponan di risico.

Banda di tur esaki muchanan y hobennan tambe ta sigui cu otro problemanan cu prome cu e situacion aki a presenta ya caba nan tawata tin. Mayornan ta haciendo tur nan esfuerso pa nos muchanan y hobennan ta mas sigur cu ta posibel, pero tambe hopi biaha ta den e momentonan di crisis descuido ta presenta. Durante e dianan aki Telefon pa Hubentud a ripara cu yamadanan cu preguntanan tocante salud mental di nos muchanan y hobennan, y e situacion na cas ta aumentando. Asina mes cu e muchanan y hobennan ta na cas den e dianan aki cu al menos un di nan mayornan, nos muchanan y hobennan no ta comunicando tur nan preocupacionan cu nan mayornan.

Na e momentonan aki mayornan por tin mas stress y cual lo por refleha den e trato duna na nos muchanan y hobennan.

Nos tin cu corda cu mescos cu e crisis aki ta algo nobo pa adultonan, e ta nobo tambe pa nos muchanan y hobennan. Diripiente na cas hopi dia sin por topa cu amigonan, sin contesta di con lo sigui cu nan estudio y futuro, y sin por haci nan deporte preferi, por tin efecto ariba e sintimentonan di nos muchanan y hobennan. Sintimentonan di ta ferfela, tin stress, depresion, soledad y no tin control. Contacto humano ta casi mes esencial cu bebe awa y come cuminda. Sigur den temponan di insiguridad, ansha y stress, e contacto humano ta juist importante. Na momento cu esaki no tey, nos ta sinti nos mes menasa. Tur esaki tin efecto ariba sintimentonan y comportacion. Awor aki no por otro, pasobra Aruba mester di nos tur. Nos tur mester keda den cas, pa asina hunto nos tur por yuda Aruba.

Fundacion Telefon pa Hubentud Aruba kier a encurasha e muchanan y hobennan pa probecha di e momentonan extra aki pa comunica mas cu bo mayornan. Tambe nos kier a pidi mayornan pa duna nos muchanan y hobennan mas espacion den e dianan aki pa expresa nan mes. Si acaso nos muchanan y hobennan no sa con pa haci esaki, of no ta durf of no ta sinti e confiansa pa papia cu nan mayornan tocante locual ta molestiandonan, Telefon pa Hubentud kier a recorda tur mucha y hoben cu nos tey tur dia di 2:00 te cu 6:00 di atardi pa scucha nan. E servicio di Telefon pa Hubentud ta gratis, anonimo y confidencial. Banda di yama nos, tur dia por chat cu nos via di e 131app di 2:00 te cu 6:00 di atardi. 131app ta gratis y por download e via App Store of Google Play. Tambe por haya informacion via nos website: 131.aw of por bishita nos facebook: https://www.facebook.com/telefon.hubentud/.