Home » Parlamentario Jennifer Arends-Reyes Gobierno a presenta na Parlamento e ‘worst case scenario’ pa Aruba y ta depende di nos comunidad pa nos logra un mihor scenario na final.

Parlamentario Jennifer Arends-Reyes Gobierno a presenta na Parlamento e ‘worst case scenario’ pa Aruba y ta depende di nos comunidad pa nos logra un mihor scenario na final.

by Admin
0 comment 44 views

Oranjestad: Parlamento diamars mainta a trata presupuesto 2020 caminda miembro di fraccion di AVP, Jennifer Arends-Reyes, a mustra cu tabata un reunion bou circunstancianan special y caminda medidanan di precaucion a wordo tuma relaciona cu e corona-virus.
“Sin duda tratamento di presupuesto 2020 tabata uno hopi excepcional sigur mirando e tempo cu pais Aruba y henter mundo ta bibando aden na e momentonan sumamente fastioso caminda nos pais tambe a wordo confronta cu e virus aki covid-19.
Nos ta totalmente den un otro esfera caminda Parlamento tambe mester a atende cu cosnan den un forma diferente.
Tratamento di presupuesto 2020 tambe a percura pa presenta un scenario cu practicamente nunca antes a wordo presenta y for di comunidad a bin hopi pregunta riba e cambionan cu nan a mira entre otro na momento c’un Parlamentario ta hiba palabra, e sala ta completamente bashi.
Esey tabata un di e precaucionnan cu Parlamento a tuma pa purba di percura cu lo tin menos contacto cu otro y reduci e posibilidad pa un contagio mas tanto posibel manera cu a wordo pidi pa autoridadnan concerni.
Nos fraccion mes tabatin tres miembro kendenan a regresa Aruba for di exterior y cu a cay den e periodo di cuarentena di 14 dia pero e reunion a cay net den e periodo ey y nan a opta di ta miho nan sigui den cuarentena manera a ser pidi.
Di otro banda nos por a ripara si c’un lider di fraccion cu ta sostene gobierno, no a duna oido na e exigencia di su gobierno y a dicidi di duna acto di presencia den e reunion aki sin cumpli cu e 14 dianan stipula pa autoridadnan.
Tratamento di presupuesto a resulta un reunion caminda hopi pregunta di fraccion di AVP no por tawatin claridad riba nan, caminda nos a keda sin informacion manera ki efecto e prestamo aki lo tin, si tin palabracionan haci caba cu por ehempel Hulanda of no.Nos no por pre-mira e ora pa e falta di informacionnan aki pa nos por a duna un acuerdo total pa e proposicion cu tabatin riba mesa mirando e suma ta sumamente grandi y cuantioso pa pais Aruba, ki efecto esaki lo bay tin y si e fondonan lo ser uza den fase y con lo controla esakinan.
Sigur nos tin cu bisa pa loke ta e proposicionan tambe pa yuda e fondonan di tanto SVB, AZV y otro fondonan, pero tambe persona- y gruponan caminda sigur fraccion di AVP no tin obhecion pa e parti aki pero si ta keda e falta di mecanismo di control cu nos a mira cu ta haci falta. Pa loke ta e situacion di Aruba na e momentonan aki, caminda cada caso cu ta confirma c’un hende ta contamina ta uno di mas.
Pa e motibo aki tambe fraccion y partido AVP ta haci un apelacion na comunidad pa duna tur cooperacion y sigui e liña di instruccion cu e profesionalnan ta bisa nos, tanto pa loke ta toque de queda pero tambe e aspecto di cuarentena, pa nos sigui pone di nos banda pa asina mas pronto posibel, pa atrobe Aruba y principalmente e sector turistico, economia, scolnan y parti laboral, tur lo por yega na alcansa un nivel di normalidad bek.
Esaki por wordo logra solamente c’un esfuerso colectivo caminda cada un di nos mester duna nos aporte pa logra esaki y den e proceso aki nos yuda contene e pandemia y loke ta e embargadura di e efectonan negativo pa nos pueblo y dushi isla,” Parlamentario Jennifer Arends- Reyes a declara.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio