Home Local Breaking News : Aruba ta conta cu un total di 28 caso...

Breaking News : Aruba ta conta cu un total di 28 caso di Coronavirus ; ‘Shelter in place’ lo bay wordo introduci’.

SHARE

Nota editorial:Aruba Native ta basa su publicacionan riba informacion ricibi for di fuentenan oficial. Nos ta suplica nos lesadornan pa sigui recomendacionan for di fuentenan oficial, esnan local (p.e. DVG, Hospital…) y internacional (p.e. WHO, CDC..).

Durante conferencia di prensa di Gobierno di Aruba, Minister President Evelyn Wever- Croes a duna di conoce cu na e momento aki Aruba tin 28 caso di COVID-19. Esaki ta un adicion  di 9 caso, di cual 6 ta di un solo lugar.

Dr. Hendrikus van Gaalen, Director Medico di Respaldo, a duna di conoce cu nan tin 5 empleado contagia cu e virus y cu tin cliente tambe cu a ser transmiti cu e virus. Un di e casonan aki Dr. van Gaalen a indica cu ta mas serio cu e otronan.

E aumento aki di caso di Coronavirus a pone cu lo impone diadomingo awor un ‘shelter in place’. Esaki ta prohibi persona di sali di nan cas. Cuidadanonan mester keda paden di nan hogar, solamente pa algun excepcion o motibo urgente/esencial lo por sali.

Minister President Wever – Croes a informa cu esnan cu tin cu cuida di otro persona, haci compras di cuminda, o cu ta haci trabounan esencial lo por sali. Nan lo tin cierto libertad pa move pafor di nan cas. Lo no sera tur negoshi, supermarket ta keda habri y tambe otro establecimento cu ta bende cuminda via drive thru o delivery.

Por bay supermercado, bay botica y esnan cu ta traha na lugarnan esencial lo por bay trabou. Gobierno lo bay informa kico ta e trabounan/instancianan esencial cu lo keda habri y cu lo tin excepcion.