Desde 16 di maart 2020 ADS a propone un protocol pa dunador di cuido oral encuanto COVID-19 cu lo keda vigente te dia 31 di maart proximo y lo wordo evalua y si ta necesario prolonga y ahusta, depende e situacion di e crisis di e coronavirus.
E protocol ta lo siguiente:
Tur tratamento regular ta keda posponi.
Cada dunador di cuido oral ta keda disponibel pa nan pashent, via telefon y den hopi caso tambe via email. Lo atende solamente casonan di emergencia (spoed) na e consultorio.
Ora e pashent tuma contacto cu e consultorio, lo tin un screening di e pashent. Esaki lo consisti di varios pregunta.
E dunador di cuido ta evalua e caso usando e informacion ricibi di e pashent
Si ta asina cu e caso no ta di emergencia, e pashent ta hanja splicacion y/of instruccion. Den e caso cu mester receta remedi lo purba di hasi esaki directamente via e botica. Por ehempel e dentista por fax of email e botica.
E casonan cu si ta spoed ta ser atendi segun un cita confirma telefonicamente of via email.
E consultorio NO ta ricibi pashent sin cita.
E protocol ta conta pa pashent nan cu NO tin sintomanan di griep, verkoud of problemanan respiratorio.
Den e caso cu un pashent, cu ta infecta cu coronavirus, tin un caso di emergencia esaki ta bai semper den “overleg” cu DVG. Mescos ta conta pa pashentnan den cuarentena.
E manera di traha lo ta diferente tambe, lo tin mas distanciamento, lo evita aglomeracion den sala di espera y preferibel bin bo so, of cu un guia si ta necesario.
Tuma bon nota cu cada praktijk lo tin nan mesun orario y manera di traha. Informacion lo wordo duna via social media, aviso na porta di consultorio, via voicemail of secretaria.
Nos ta compronde cu e cambionan aki por trece cierto inconvenencia y nos ta pidi un y tur pa yuda nos FLATTEN THE CURVE.