Recientemente e prome personanan cu a keda contagia localmente a bira realidad. Un situacion sumamento peligroso.
Loke Gobierno a bin ta trata na evita a bira nos realidad. Awor mas cu nunca ta importante pa cumpli cu e instrucionan estrictamente.Pueblo mester lanta for di soño! Cada un di nos mester asumi nos responsabilidad prome cu ta mucho laat!
Coronavirus tin nos gobernantenan ta trahando around the clock. Nos Minister President a demostra cu nan ta atendiendo cu e situacion debidamente. Awor falta e cumplimento di parti di pueblo! Pasobra ta hunto nos ta bay surpasa e momento dificil aki. Con dificil e lo bira ta depende di e actitud y actuacion di cada un di nos riba e pida baranca aki. Mi ta resa pa Papa Dios spaar Aruba di e situacion cu Italia ta pasando aden caminda e Prome Minister, cu awa na wowo, ta bisa nan a perde tur control y ta sclama Dios pa rescata e pueblo di Italia.
Na Aruba nos mester realisa y ta consciente cu:
No ta existi un cura pa e virus!
No tin solucion y best practices!
No tin un bista sigur di su impacto y consecuencianan!
No tin experiencia y experticio specifico riba e situacion aki!
Un cos ta sigur:
E la pone nos tur para keto (tin ainda no pero no lo tarda mucho mas) den tur sentido di palabra;
E NO conoce precedencia;
E tin nos tur limita y a kita nos libertad;
E la siña nos balora e cos mas importante den bida cu ta nos salud y nos famia;
E la trece nos mas serca di Papa Dios;
Tromp-Lee ta apela fuertemente na pueblo pa ban stop di plam’e! No ban warda e prome morto cay pa nos bira responsabel. E lo por ta abo mes, un miembro di bo famia of circulo di amistad. E ora nos ta mucho laat. Para keto un rato y pensa cu esaki por bira nos realidad si nos no actua awor.
Tuma tempo pa wak loke ta pasando mundialmente wela, welo, mayornan ta muriendo nan so sin un ser keri cu nan, sin un man di consuelo, sin por bisa ayo. Esaki todo por todo nos mester preveni.
Nos infrastructura medico conoce su limitacion y no por carga un cantidad grandi di personanan contagia cu ta rekeri di cuido intensivo. Nos por preveni e situacion cu ta tumando lugar na otro pais. Ban ‘flatten the curve’ door di cumpli cu instruccionnan ya comunica door di instancianan oficial. Hunto nos por!