Home Uncategorized Minister di Enseñasa ta duna di conoce su conseho pa e maneho...

Minister di Enseñasa ta duna di conoce su conseho pa e maneho di centrale – examens, doorstroomtoets y stage durante crisis COVID-19

SHARE

E crisis di COVID-19 a resulta den e cierre di tur scol na Aruba, esaki pa preveni infeccion o transmision di e virus. Studiantenan tin algun dia caba na cas. Algun scol a adapta nan lesnan y a prepara material pa nan studiantenan por traha riba dje na cas. E situacion aki a causa si cu hopi studiante y mayor a keda cu pregunta riba toets, stage o otro examens cu a keda pendiente.

Den un publicacionan haci pa Aruba su Minister di Enseñansa, Ciencia y Desaroyo Sostenibel, Dr. Lampe ta duna claridad riba e preguntanan aki. E siguiente ta un resumen di e conseho duna na scolnan di diferente nivel educacional.

Educacion Primario

Doorstroomtoets ta wordo cancela. Schooladvies (e conseho cu e docente ta duna) lo conta como prueba pa permiti un studiante entrada pa HAVO, MAVO O EPB. 30 di maart ta e deadline pa docente entrega nan schooladvies.

Educacion Secundario (Voortgezet Onderwijs)

E rekentoets pa MAVO, HAVO y VWO ta wordo cancela.

Hulanda a cancela nan centrale-examens (e examen duna na final di e aña escolar). Esaki ta causa cu na Aruba centrale-examens tambe lo cay afor.

E delaster schoolexamens cu inicialmente a wordo plania pa tuma lugar den e prome siman di april 2020, lo mester wordo movi pa un periodo mas despues. Scolnan ta wordo duna te cu fin di mei 2020 pa finalisa nan schoolexamens.Conseho ta wordo duna pa haci esaki mas hopi posibel na un distancia (p.e. dunando e examen riba un platforma online)

E averahe di e puntonan ricibi pa e 3 schoolexamens lo dicta si un studiante lo haya su diploma.

Educacion Profesional (Beroeps Onderwijs)

Studiantenan cu ta den un periodo cu nan mester core stage, ta wordo informa cu esaki lo wordo movi pa un periodo mas despues. Esaki lo no tin un impacto negativo riba e ricibimento di e diploma.

Examens pa ‘beroeps onderwijs’ si lo bay door pa motibo cu esaki no ta mara na examens duna na Hulanda. Ta pidi pa esaki mas hopi posibel wordo duna riba un distancia (pues si ta posibel online). Examens cu no ta riba un distancia ta wordo pidi pa papia cu DVG (Departamento di salud publico) pa conseho.

Educacion Universitario (Hoger Onderwijs)

Tentamens , toets y otro projecto escolar lo mas posibel mester tuma lugar riba un distancia. Si esaki no ta posibel ta pidi pa move fecha di esaki pa un periodo despues di 4 di mei.

Adhunto por lesa e publicacionan original abou.