Home International Coronavirus: Homber ta fayece pa motibo di a ingeri Chloroquine ; Esaki...

Coronavirus: Homber ta fayece pa motibo di a ingeri Chloroquine ; Esaki despues cu Presidente Trump ta anuncia Chloroquine como posibel ‘cura’

SHARE

Nota editorial: Aruba Native ta encarga su mes pa duna cobertura esencial di e lucha contra Coronavirus. Esaki ta nos responsabilidad periodistico pa asina mantene e pueblo di Aruba debidamente informa y educa riba con pa atende cu e crisis actual. Aruba Native ta basa su publicacionan riba informacion ricibi for di fuentenan oficial. Nos ta suplica nos lesadornan pa sigui recomendacionan for di fuentenan oficial, esnan local (p.e. DVG, Hospital…) y internacional (p.e. WHO, CDC..).

Arizona, Merca – Un homber a fayece despues di automedica su mes cu Chloroquine. Un pareha Mericano tawata mirando un conferencia di prensa momento cu nan a haya e informacion cu e medicamento Chloroquine lo por ta un ‘cura’ pa COVID-19.

Apesar cu expertonan medico ta conseha pa warda mas investigacion wordo haci riba e uzo di Chloroquine, Presidente Donald Trump a informa lo contrario. Bisando miyones di hende mirando su conferencia cu Chloroquine por wordo uza, sin duna ningun advertencia pa ciudadanonan warda conseho medico (o por lo menos haci esaki bou guia di un dokter).

Momento cu e pareha a scucha cu Chloroquine por wordo uza, e homber a bisa su señora cu nan tin e remedi na cas. Nan tawata tin Chloroquine Phosphate, un kimico pa combati parasito den aquarium. E pareha ta di un edad mas avansa y ta comprendibel cu nan tin miedo di wordo infecta cu e Coronavirus.

Pues e pareha aki a ingeri Chloroquine na nan cas como un medida pa ‘preveni’ e Coronavirus. Dentro di 20 minuut, ambos a bira hopi malo y mester a wordo transporta cu urgencia pa hospital. E homber a fayece yegando hospital y actualmente su casa ta den ICU.

Ta haci un suplica na nos lesadornan pa por fabor no automedica o ingeri nada sin consulta cu bo dokter. E miedo cu tin pa e virus ta comprondibel, pero tumando medicamento o otro substancia sin consulta cu bo dokter ta un acto hopi peligroso y cu por ta hasta resulta fatal.