Home Local Ex-Prome Minister Nelson Oduber: “Dia 25 di maart 1977 e prome Referendum...

Ex-Prome Minister Nelson Oduber: “Dia 25 di maart 1977 e prome Referendum consultativo den Reino Hulandes a tuma lugar na Aruba”

SHARE

Lo ta bon pa den nos historia den Reino Hulandes mi describi henter e organisacion di e Referendum consultativo cu a tuma lugar riba dia 25 di maart 1977, esta riba un dia manera awe 43 aña pasa. E referendum aki tabata riba proposicion di e visionario Betico Croes (dfm).
Pakico tabatin mester di un referendum? Hecho ta cu masha poco pais na mundo tin den nan constitucion cu pa cierto asuntonan importante mester tene un referendum pa consulta pueblo con nan ta pensa. Suisa ta un pais cu si tin e instrumento aki.

Ta conoci cu desde augustus 1973 partido MEP tabata gana landslide tur eleccion manera na 1975, 1977, 1979 (2 biaha), 1982 y 1983, tanto pa Eilandsraad como Staten. Nos tabata considera esaki como un mandato pa goberna, pero Betico Croes (dfm) tabata kier pa gobierno organisa un referendum consultativo hunto cu un campaña di informacion pa pueblo.

Boycott di e Referendum
E tempo ey como diputado di e.o. structura estatal mi a ser encarga pa nos haci tur e tramitenan necesario pa organisa e referendum consultativo. A institui un comision di Referendum consistiendo di e siguiente miembronan: John van der Kuyp, Hose Figaroa, Armando Muyale y Juan E. Wever. Betico tabata desea pa den e referendum ey nos permiti tur hoben cu a nace na Aruba y cu a cumpli 18 aña, sea nan tabata Hulandes of no, pa laga nan tambe vota den e referendum. E tempo ey partidonan AVP y PPA a boicotia e referendum y nan a bisa pa pueblo no bay vota, pero pa bay lama riba e dia cu gobierno a duna liber. Gobierno Antiano y Gobierno Hulandes a tuma un actitud apatico bisando cu nos sistema legal no conoce den nos Constitucion e instrumento legal di un Referendum.

Nos como Bestuurscollege a nombra un comision bao guia di Carlos Bislip, Roy van Putten, Leo Yarzagaray, Albert Eman, Dominico Flemming, Godfried Eman, John Hart y Atan Lee pa organisa den tur bario anochinan informativo relaciona cu e referendum. Nos como Bestuurscollege a dicidi cu ta organisa e referendum consultativo dia 25 di maart 1977 y a haci tur e preparacionnan necesario.

Gobierno Antiano mediante Minister di Husticia a prohibi Cuerpo Policial pa mantene orden riba e dia di Referendum y a boycott henter e proceso. Nos Bestuurscollege a pone tur e bewakernan di gobierno cu tabata cuida edificionan pa nan mantene orden publico riba e dia ey.

Resultado di e Referendum
E dia di Referendum mes a bay masha ordena y den tur trankilidad. E pregunta clave den e Referendum tabata, con bo kier nos regla nos futuro structura estatal, esta den Antias di 6 of pafor di e constelacion Antiano. Bo kier un Aruba independiente of pa Aruba keda den Antias? Nada menos cu 82.5% a duna gobierno den e referendum e mandato pa regla esaki pafor di e constelacion Antiano. Nos tabatin observadornan di e otro islanan di Antias, di Nacionnan Uni pa yuda vigila e proceso. Cu e resultado di e Referendum aki Betico Croes a cuminsa haci tur preparacion pa Aruba su futuro wordo regla pafor di e constelacion Antiano.

Foro internacional a yuda nos causa
E resultado di e referendum a ser entrega oficialmente na Gobierno Antiano y Hulandes. Nan actitud no tabata tanto cooperativo ni receptivo. Pa pone presion riba Hulanda, Betico Croes a busca afiliacion politico riba tereno internacional cerca Social Democrata Internacional (S.I.), unda primeramente nos a bira miembro observador y despues miembro oficial. E foro internacional aki a yuda nos causa grandemente.

No lubida cu no solamente e referemdum tabatin hopi boycott politico, pero hasta ora nos a gana eleccion pa Staten di Antias na 1977 cu casi 6 asiento di e 8 asientonan, e partido chikito PPA cu solamente 1 asiento a drenta Gobierno Antiano locual legalmente tabata por, pero tabata un falta di respet total pa resultado di e referendum y eleccion. A bin accionnan di Augustus 1977, unda e pueblo aki masalmente a demostra cu nan no ta acepta cu partido MEP a ser teni pafo di e gobierno Antiano.

E vision di Betico Croes tabata algo hopi grandi pasobra esunnan cu a haci mofa di e referendum, despues tur e otro islanan tambe a organisa no 1, pero varios referendum. Despues hasta Hulanda a organisa un referendum consultativo pa haya sosten pa e aprobacion di e Constitucion Europeo, anto un gran mayoria a rechasa esaki. Y no obstante e resultado negativo, nan a keda trankil.

Ta p’esey mi ta pone esaki pa historia como cu mi tabata e diputado encarga cu e organisacion di e prome Referendum den historia di Reino Hulandes y cual tabata danki na e visionario Betico Croes.