Spaña – Residentenan di cas di cuido pa anciano ta keda bandona pa e personal encargo pa atende cu e hendenan aki. Militarnan Spaño ta haya varios curpa sin bida riba nan cama drumi. Esnan cu ta traha na e casnan aki cu ta responsabel pa cuida grandinan a bandona nan trabou.
Minister di defensa Spaño,sra. Margarita Robles, a duna di conoce cu lo ta hopi mas estricto y inflexibel cu e manera cu grandinan ta wordo trata. Personanan di edad a wordo laga totalmente pa nan cuenta y curpa sin bida laga riba nan cama.
Tur esaki a sosode despues cu a keda confirma cu tin caso di Coronavirus den e casnan di anciano.
Pa es motibo Spaña su minister di salubridad, sr. Salvador Illa, a indica cu mas prioridad y supervision lo wordo duna den e casonan aki.
Bou circumstancia normal, persona cu fayece lo wordo transporta pa un mortuario inmediatamente. Den e caso di un morto pa motibo di Coronavirus, esaki mester warda un equipo special pa bin busca e curpa. Tin caso unda cu esaki por dura casi 24 ora prome cu un morto wordo busca.
E pais Europeo aki ta un di esnan mas afecta pa e coronavirus. E total morto ta 2182 persona desde cu e pandemia a cuminsa. Spaña no tin caminda mas pa warda e curpanan di fayecido. E virus ta hacie mas complica ainda paso e curpanan ainda por contagia otro hende cu Coronavirus.
Un solucion temporario cu e cuidad di Madrid a bin cune ta pa warda e curpanan di fayecido di e virus na un ‘arena di ijs’ yama Palacio de Hielo. Esaki ta un area unda probablemente hende tawata schaats. Aki e curpanan lo keda te ora cu funeraria por busca y transportanan.