Brazil – Tribunan isola den e Amazonia ta bou peliger. Gruponan evangelico cristian ta uzando nan influencia cu gobierno di Brazil pa asina purba haya contacto cu mas tribunan. E grupo evangelico, yama Ethnos360, tin como meta pa converti delaster un tribu na mundo pa bira cristian.
Esaki a lanta un alerta pa e peliger cu nan ta presenta pa e grupo di hende indigena. Mester tene na cuenta cu e hendenan aki residencia den Amazonia no tin proteccion o resistencia pa enfermedad cu e grupo evangelico aki por trece cu nan. E tribunan aki ta biba isola y no a ricibi cierto vacuna.
Tin miedo cu malesanan mortal, incluyendo Coronavirus, por wordo treci na e comunidad vulnerabel nan aki. E grupo evangelico radical Ethnos360 a hasta cumpra un helicopter pa asina yega na e areanan mas dificil pa encontra.
Expertonan medico ta informa cu si e tribunan aki bin den contacto cu cualkier enfermedad cu nan no tin resistencia pe, e lo ta devastador pa nan comunidad. Por mira comunidadnan henter
bay perdi.
E ideologia di e evangeliconan aki ta sumamente peligroso. Nan pensamento ta pa trece palabra di Dios na e tribunan aki hasta si e por causa morto mes di varios persona. E proteccion di e grupo vulnerabel aki ta den man di e gobierno derechista di Jair Bolsonaro.
Presidente Bolsonaro tin un historia largo di propaganda pensamentonan discriminatorio y no ta mustra di ta sostene e gruponan indigenanan. E grupo Ethnos360 tin varios escandalo cu a ocuri den nan organisacion. Na 2014, Warren Scott Kennell, un cristian evangelico cu ta miembro di e grupo a ricibi un castigo di prison pa pornografia infantil y pa abuso sexual di muchanan indigena.
Un otro miembro di e grupo aki, Manoel de Oliveira, a haya 3 aña di prison despues di a tene hendenan indigena como basicamente catibo. E impresion di e actonan di Ethnos360 ta duna un sentido cu e grupo kier probecha di e momento unda cu no tin suficiente hende poniendo atencion.
E momento aki cu nos ta den un crisis mundial di COVID-19. Embes di acepta y respeta e cultura y creencia di e tribunan, e grupo a mustra di ta acelera su plan di converti tur tribu na mundo pa cristianismo. Un pensamente cu lo por costa bida di centenares di persona indigena.
