KRALENDIJK/WILLEMSTAD:
Diamars ultimo a sosode un atraco arma den cual e atracadornnan lo a baha na awa cu un suma grandi di placa.
Polisnan na Boneiro a haci un peticion riba Kustwacht pa controla tur e botonan sospechoso cu tabata sali di Boneiro pa bay direccion di Corsou. Pa motibo cu nan tabata tin un sospecho cu e atracadornan aki lo bay tuma un boto y bay direccion Corsou.
Diahuebs mainta e Centro di Rescate y Coordinacion di Kustwacht a detecta enberdad un boto sospechoso cu a sali for di Boneiro y tabata bayendo direccion di Corsou. Mesora Kustwacht a manda e Cutter, Jaguar na e localidad unda boto sospechoso aki tabata ta. Tambe nan a informa Polis y douane pa dunanan un man den e caso aki. E boto sospechoso aki a bin for di Boneiro y a drenta Spaanse water direccion di e waf di piscado na Caracasbaai. Aki ta caminda cu Kustwacht, polis y tambe Douane tabata warda riba nan.
Riba e boto tabata tin dos homber sospechoso, nan a keda deteni. Mientras tanto cu e boto a wordo mara na e pier di Kustwacht, pa asina haci un control intensivo abordo. Durante e control, abordo di e boto autoridad a bin topa cu un suma grandi di placa, esaki mesora a wordo tuma den beslag. E dos personanan sospechoso y e cantidad di placa a wordo entrega na KPCN pa mas investigacion.