MEP A LANTA BANDERA MAS GRANDI NA ARUBA NA UN MANERA SPECIAL
Tur dia 17 di maart prome cu mitar di anochi ta un tradicion cu e organisacion social democrata MEP, ta lanta e bandera di mas grandi na Aruba pa yama bon bini na e grandi celebracion di himno y bandera. Loke ta diferente cu tur otro fecha e biaha aki ta cu Aruba ta den e crisis di corona virus. Nunca antes mundo henter no a experiencia e gara di un virus asina chikito, cu un impacto asina grandi riba henter humanidad. Awe Aruba tambe ta den e gara di e virus, y gobierno di Aruba ta hasiendo tur posibel pa contene e risiconan.
Como presidente di partido Tevreden a lanta e bandera di mas grandi di Aruba na un manera special, cu un oracion. ‘Awe nos ta pidi Dios pa forsa pa esnan afecta tur parti mundo pa e coronavirus, y nan famia. Nos ta pidi proteccion pa tur profesionalnan dunador di cuido y sabiduria pa esnan cu ta buscando un cura pa e virus. Nos ta pidi guia especial pa nos gobierno y nos minister Presidente pa e retonan grandi cu nos pais ta enfrentando cu nos economia y nos bienestar en general. Y nos ta pidi cu e coronavirus no lo afecta ningun bida di nos ciudadanonan’, tawata Tevreden su oracion.
UNION DI UN PUEBLO
Ariba dia di himno y bandera mas cu nunca nos pueblo tin di uni. Esaki ta locual nos himno y bandera ta representa pa nos, instrumentonan clave cu a logra trece union den nos pueblo. Dia 25 di februari 1976 ‘Aruba Dushi Tera’ a wordo reconoce como nos himno nacional. Y sin cu nan lo por a premira unda Aruba lo ta den 2020, awe mas cu nunca nos lo canta ‘un tin nada pa kibre’. Nos ta para como pais dilanti retonan grandi. Tin un paro ariba entrada di turistanan pa evita cu nos lo haya mas casonan di e virus, nos scolnan ta sera, nos trahadornan ta den un incertidumbre, y nos no tin un bista completo ainda con largo esaki lo dura.
Pesey ariba un dia manera di nos himno y bandera nos tin di para keto y reflecciona pa nos traha hunto sin destincion di denominacion, rasa o ideologia politico pa nos por sali for di e situacion aki. Nos forsa ta den union, Tevreden a sigi bisa.
DIA 18 MAART 2020 DIA NACIONAL DI ORACION
Tur momento den historia cu nos pais a pasa den su momentonan difisil, Dios semper a sa di contesta nos y semper a yuda nos cu un solucion sobrenatural. Pesey gobierno di Aruba a apunta dia 18 di maart 2020 como un dia nacional di oracion pa 6:00 di atardi. Asina aki tur cuidadano unda cu nan por ta, sea nan so o cu nan ser keri por uni den oracion simultaniamente. Tene na cuenta cu no por bai misa, tin di keda na cas, pero lidernan spiritual por usa media pa por stream esaki pa tur creyentenan. Nos ta celebra un dia di himno di bandera diferente, pero pronto cosnan por normalisa atrobe. Un felis dia di himno y bandera na Aruba henter, Tevreden a termina bisando.
