Na caminda pa celebracion di nos Himno y Bandera, a toca Minister di Asunto Social y Labor e honor di por a organisa un bunita celebracion pa nos muchanan di Imeldahof dirigiendo e enfoke riba e heroe den alma di nos muchanan.
Un atardi di bunita actividad cu a cuminsa cu un recorido den bus di Cucoo Cunuko. Ora cu nos muchanan a yega bek Imeldahof, Muchanan Sabi bou direccion di Edselyn Figaroa a entretene nos muchanan cu canto y baile. Algun integrante di Muchanan Sabi ta biba na Imeldahof. Pues nan tambe a join den e actividad, un show cu a yena tur presente cu kippevel.
Pa ilustra e heroe den cada un, e famoso cantante Derwin Kemp aka Master Gusto, a comparti historia di su trayecto di bida den Imeldahof te unda cu awe e ta den su bida, trahando pa bienestar di muchanan, aplicando loke el a siña bibando den Imeldahof. Un discurso emocionante pa motiva e muchanan kere den e heroe den nan.
Presente tabata varios Parlamentario manera Hendrik Tevreden, Shailiny Tromp-Lee, Endy Croes, Setty Yarzagaray y finalmente Darlaine Erasmus kende conhuntamente cu Rochi Geerman a inicia cu organisacion di e actividad aki prome cu el a bira Parlamentario.
Minister Glenbert Croes a expresa na nos muchanan: “Nos ta kere den boso. Boso tambe kere den boso mes. Tur locual boso kier, boso por logr’e pasobra boso tur tin un heroe ta biba den boso. Y nos t’ey pa yuda bo encontr’e.”
E mandatario a termina cu e siguiente mensahe: “nos muchanan por a tende e testimonio poderoso di un gran heroe “Master Gusto” Derwin Kemp. Tur nos muchanan ta nos heroe. Laga nos tur ta un heroe den bida di nos muchanan.”
