Diahuebs mainta, Prome Minister Evelyn Wever-Croes a bishita Scol Basico Reina Beatirx relaciona cu nos dia nacional, Dia di Himno y Bandera na unda el a wordo ricibi pa muchanan contento y entusiasma hunto cu Cabesante di Skol Juffrouw Rosalinda Granger y docentenan. E scol a brinda Prome Minister un bunita show cultural na su yegada cu canticanan popular.
Klasnan 6 A y 6 B a haya bishita di Prome Minister den klas na unda tawata tin un interaccion hopi special. Prome Minister a keda contento cu e interes di nos muchanan pa conoce mas di e historia di nos simbolonan nacional. Alumnonan na final, a desea e Premier un feliz dia di Himno y Bandera.
Prome Minister a elogia e maestronan pa a tuma tempo pa siña nan klas e historia di nos himno y bandera. Dia 18 di maart, Aruba ta celebra un di e logronan grandi di Betico Croes, of cu Betico a contribui na nan grandemente, esta nos Himno y nos Bandera, simbolonan di union y identidad di un pais. Tambe e hecho cu awe Aruba tin su propio gobierno, su propio ministernan, su propio Parlamento, su propio moneda. Y tur esaki a inculca e sentimento di orguyo den nos Arubanonan. Gobierno su meta ta pa e historia aki hamas wordo lubida.
Na e scol aki, Prome Minister a ricibi hopi interes di nos muchanan tocante e Corona Virus y Prome Minister a tuma tempo pa duna splicacion completo riba e tema aki y con Gobierno ta preparando riba e situacion aki. Prome Minister a enfatisa cu ainda Aruba no tin niun caso pero ta haciendo tur preparacion y ta pidi pa pueblo keda calmo.
Prome Minister na final a entrega un booklet cu imformacion di nos Himno y nos Bandera y un pamfelt di Competencia Escolar di Pintura. Muchanan mester pinta y corta e pintura riba e liña indica y entrega esaki na scol prome cu 27 di maart 2020.
