Mundo su instancia mas importante di salubridad publico, World Health Organization (WHO), ta declara Coronavirus (COVID – 19) un pandemia global. Diaranson merdia den un conferencia di prensa na Geneva, WHO a declara e virus cu actualmente tin unicamente 3 luna cu e a lanta cabes como un pandemia global.
COVID- 19 a infecta caba un total di 121,000 persona rond mundo. Particularmente paisnan Asiatico, Europeo y Mericano ta mas afecta.
Director di WHO, General Dr. Tedros Adhanom Ghebreyesus a splica cu “den e delaster 2 siman e casonan pafor di China a crece 13 vez y e cantidad di paisnan afecta a triplifica.”. Dr. Tedros Adhanom Ghebreyesus a continua na splica cu den e simanan dilanti lo bay mira mas casonan di infeccion, morto y mas pais ainda afecta pa e virus aki.
Segun expertonan momento cu declara un pandemia global esaki lo tin consequencianan grave pa mundo su economia, politica y e infrastructura di salubridad. E virus aki por debilita un mercado economico cu ya ta fragil y por trece cune mas restriccion pa viahe global. Hopi preocupacion tin pa e aspecto di salubridad publico, pero tambe pa economia global.
E cantidad di casonan di infeccion y morto ta keda cambia cada ora. Na momento cu ta publicando e articulo aki tin un total di 121,564 infeccion y 4373 morto rond mundo. Excluyendo e pais di origen di e virus (China tin 80778 caso), e otro paisnan mas afecta pa COVID-19 ta Italia cu 10149 caso, sigui pa Iran cu 9000 caso.
Dr. Mike Ryan, director ehecutivo di WHO su programa di emergencia di salud ta duna un ‘wake up call’ pa tur gobierno di mundo. “Esaki ta un reality check pa tur gobierna riba e planeta aki: Lanta. Prepara. E virus aki ta na caminda y bo mester ta cla. Bo tin un responsabilidad pa cu bo cuidadanonan. Bo tin un responsabilidad cu mundo pa ta prepara”.
