Despues di e resultadonan di e weekend cu a pasa, e standing di e Division Honor 2019/ 2020, ta mustra hopi interesante y cuidao cu e aña aki, cu kizas tin sorpresanan grandi na caminda.
Diabierna, 6 maart 2020, e abejanan di Dakota ta gana e equipo di United facilmente cu score di 7 – 0. Cu e resultado aki, Dakota ta keda trankil na di dos lugar, mientras cu United ta keda den sotano cu 0 punto. E goalnan di Dakota a wordo anota Joshua Gross 2x, Randell Gross 2x, Jean-Pierre Heyden, Fernando de Sousa y Daniel Briceño.
Diasabra 7 maart tabata tin 2 wega interesante. E prome wega tabata entre e tricolornan d Solito, RCA y La Fama. La Fama tabata mester di un victoria, pa sali for di posicion di Promocion/ Degradacion y un victoria pa La Fama lo juda La Fama, keda den contienda pa Play-Off tambe. E tricolornan no a bacila y ta gana e wega cu score di 2 – 0. Cu e victoria aki, RCA ta keda solido na e promer lugar den e Dvision Honor. Goalnan di RCA a wordo anota pa Walter Bennett y Kevin Peña.
E di dos wega di Diasabra a conoce un sorpresa ora cu e Piratanan di Caravel ta propina e Dragonnan di Nacional un derota di 2 – 0. Un resultado cu ta juda Caravel keda den contienda pa e Play-Off, mientras cu Nacional ta perde oportunidad pa tuma distancia for di e otro equiponan. Goalnan di Caravel a wordo anota pa Wveimar Galeano, mientras cu e otro goal a bin por medio di un autogol.
Diadomingo 8 maart, tambe tabata tin 2 wega sumamente interesante. E prome wega a bai entre e naranjadanan di Santa Cruz, Estrella contra e Uptown Boys di Brazil Juniors. Estrella tabata na di 4 posicion prome cu e weekend y un victoria lo a pone nan jega, 18 punto pareu cu Nacional. Brazil Juniors cu ta den un racha di 3 wega ganá, a cuminsa haya holo di Play-Off. E Uptown Boys ta sigui cu nan racha, y ta gana Estrella cu score di 3 – 2. Cu e victoria aki Brazil juniors ta jega 13 punto, dos punto tras di Estrella, cu ta keda na di 5 lugar. Goalnan di Brazil Juniors a wordo anota pa Kenroy Ranger 2x y Shequan Cornett, mientras cu e goalnan di Estrella a keda anota pa Trevor Faro 2x.
E di dos wega di Diadomingo a bai entre e Pumanan di Piedra Plat, Britannia y e Orgullonan di Noord, Bubali. Un victoria lo juda ambos equipo pa keda den lucha pa clasificacion pa Play-Off. Tur dos equipo tabata tin mes hopi gana pa gana e wega y asina tambe e wega ta keda empata 3 – 3. Goalnan di Bubali a wordo anota pa Jhon Silva, Rennick Maria y Edmar Tromp. Pa Britannia ta anota Joel Geerman, Johnathan Ruiz y Pieter Susebeek.
Cu e resultadonan aki e standing pa locual e Division Honor, ta keda SUPER interesante. RCA ta solido na prome lugar, sigui pa Dakota cu tambe ta mustra basta safe pa su clasificacion pa Play-Off. Pero entre e equipo nr. 4 Bubali y e equipo nr. 9 La Fama, tin apenas 4 punto diferencia. Esey kiermeen cu tur cos por bolter ainda. E weekend venidero e Campeonato ta sigui cu 4 wega. E wega entre Bubali y Nacional a keda cancela (e wega aki lo wordo programa di nobo.). Diabierna awor, 13 Maart e dos clubnan di Santa Cruz, Estrella y Caravel lo enfrenta otro. Estrella ta na di 5 lugar cu 15 punto, mientras cu Caravel ta na di 6 lugar cu 13 punto. Diasabra, 14 Maart lo tin 2 wega. Dakota ta enfrenta La Fama y despues Britannia lo enfrenta United. Daidomingo lo tin un solo wega, e Tricolornan RCA cu keto bai ta invicto lo enfrenta e Uptown Boys di Brazil Juniors, cu tin un racha di 4 victoria siguí.
