Santa Cruz – Diasabra anochi den careda di 8’or empleadonan di Citgo Santa Cruz a bati alarma pa un cabayero na sanger.
Segun nan e cabayero lo a bisa cu ela dal hende cu auto un caminda. E homber aki tawata full paranoid, y sodando profusamente.
Momento cu ela mira e patruya cu a bay parti pabou di e gasolin station e mes a core bay cerca nan. Polisnan a reconoce, segun nan e ta un “conoci’ di nan.
Asina ela cuminsa conta un monton di cosnan cu no ta cuadra. Segun e tawata bisa, hende lo a tira algo den su bebida.
Tambe cu nan ta buske pa mata y of na kier tire.
Su auto un Nissan March ela lage unda nan ta laba auto y a duna e persona cu ta laba auto su jabi.
Durante cu polisnan tawata papiando cune por a mira con su comportacion tawata keda cambia, birando mas y mas exalta.
Na prome instante e no tawata den boei, pero manera cu a mira cu e ta birando exalta polis a cuminsa prepara pa pone den boei.
Aki ta unda cu cos a bay full for di man, unda cu e agente mester a usa un sweep, bayendo suela cune y asina boei e.
Akinan ela sigui papia un monton di cosnan bruha, manera cu polis kier tire y lo tin arma poni den su lomba.
Mientrastanto Transportwagen tawata yegando.
Eynan un otro lucha, unda cu mester a boei e na man y pia. Durante cu nan tawata hincando e den e Transportwagen ata e boei di pia a los, un otro lucha atrobe pa pone bek.
Loke nos a haya sa na e sitio ta cu no ta prome biaha cu polisnan mester a atende cune, door di su uso di droga.
Elo ta usa un droga cu ta pone halucina formal. Su wowonan tawata cora y tawata keda soda y grita. Ki droga e ta no ta conoci.
Trabou di polis no ta uno facil, esey nos por a mira claramente diasabra anochi. E agentenan policial aki a demostra profesionalismo door di keda mas calmo posibel y actua ora mester a actua.
Bon trabou.
