Dellanire Maduro, Presidente di e Comision fiho di Asuntonan Social, Famia, Cuido pa nos Grandinan y Salubridad Publico di Parlamento a comenta cu diamars atardi e miembronan di e comision aki a reuni cu e Asociacion di Dokternan di Cas (HAVA) y e Asociacion di Specialistanan di Hospital di Aruba(ASHA). Topico di e reunion aki tabata con e preparativonan ta y con e plan di accion ta pa loke ta e virus nobo di Coronavirus.
Intencion tabata pa tur miembro por a haya mas informacion riba e preparativonan y e plannan cu e gremionan di dokternan di cas y specialistanan di Aruba tin pa loke ta e Covid-19. Esaki ta e prome reunion cu e comision tabatin pa atende cu e tema aki y eventualmente lo bay reuni cu mas stakeholders den e siguiente dianan pa por haya mas informacion riba e protocolnan cu tin, con nan ta “sluit aan” na otro y wak con for di Parlamento por contribui si ta necesario.
Puntonan mas importante cu a bin dilanti durante e reunion di diamars, segun Maduro, ta cu ta pidi esnan cu ta malo pa por fabor no bay oficina di dokter y evita asina contagia otro personanan cu ta na e oficina. Tambe na ken por asisti si tin un sospecho cu tin e virus riba cual dentro di poco Departamento di Salud Publico pronto lo bay suministra informacion adicional y mas especifico. Igualmente a informa cu diabierna awo e stakeholdernan lo bolbe sinta na mesa cu otro, cual ta hopi positivo mirando cu ta reuniendo na un manera mas frecuente.
Tambe a bin dilanti e punto pa percura pa dunadornan di trabou, specialmente den e area hotelero, di alimento y bebida y transporte duna un splicacion na e trahadornan con pa proteha nan mes y con pa reconoce e sintomanan di e virus.
Un pregunta cu a bin dilanti durante e reunion ta e forma cu mester meld ao na SVB den caso di sospecho di Coronavirus, a pidi pa bin cu un procedura diferente pa e persona cu ta sospecha cu tin e virus no acudi na oficina di SVB pa evita contagio na otro personanan presente.
Dellanire Maduro ta contento cu Departamento di Salud Publico a bin cu hopi informacion riba con pa evita contagio y pa proteha bo mes, pero mirando cu nos tin un poblacion grandi y di diferente asendencia, e ta considera cu lo por bin cu esaki tambe na idioma Spaño, ‘Sign Language’ y Braille, involucrando asina mas hende.
Parlamentario Maduro ta gradici e dos instancianan pa acudi na e reunion y pa comparti informacion riba Covid-19.