Pos Chikito – Diahuebs atardi algo prome cu 4’or polis a haya informacion di un accidente di trafico altura di Serlimar na Pos Chikito. Informacion adicional a papia cu lo tin hende herida.
Na yegada di polisnan di trafico nan a constata cu un auto color preto a bay dal contra muraya di e cas cerca di Serlimar.
Momento cu nan a bay papia cu e chauffeur cu ta un homber a ripara cu elo a haya golpinan serio, y esaki tawata motibo suficiente pa pidi pa un Ambulance cu urgencia.
E accidente a coy un otro direccion, esta cu lo no tawata trata di un accidente pero algo intencional.
Pues segun nos por a compronde di e habitante/nan cu e homber aki lo tin problema cu nan, y aparentemente segun nan lo a bay pa dal un persona cu e auto. Pero, a faya y a dal hopi duro contra skina di e cas.
Den e impacto e homber esta e chauffeur a resulta seriamente herida, unda cu elo a sufri golpinan serio paden. Polisnan cu a mira su situacion ta serio a pidi pa ambulance yega lihe.
Momento cu polisnan a wordo notifica door di e habitantenan di e cas kiko a pasa, a bay over pa pidi pa recherche y tambe bfto(departamento tecnico).
Dos ambulance a presenta na e sitio, uno cu a transporta e chauffeur pa hospital y e otro pa atende cu un habitante di edad cu a presencia e boksmento y despues a cuminsa bira malo, debi cu elo ta sufri di algun enfermedad.
Takelwagen a move e auto y pone dilanti Serlimar.
Kiko lo ta e problema entre e homber aki y esnan na dicho adres polis lo tin di bay saca afo.
