Ministerio Publico di Aruba ta considera abuso sexual di menor na man di un turista Mericano pedofil como un crimen leve, pues no uno cu ta rekeri cualkier castigo severo. Den e siguiente publicacion haci pa Aruba su oficina di Ministerio Publico por lesa con pedofilia ta wordo categorisa como un delito ‘leve’.
Segun Ministerio Publico ta publica :
“Ministerio Publico a ripara cu prensa tin preguntanan tocante un decision recien den caso di un sospechoso Mericano di un caso di zeden, cu tabata na Aruba como turista. E decision di Ministerio Publico a wordo tuma conforme e richtlijnen (liñeanan di maneho) di Ministerio Publico pa loke ta delitonan di zeden.
Delitonan leve di zeden ta bin na remarke pa un asina yama TOM-zitting. Den un TOM-zitting Ministerio Publico mes ta dicidi, debi na e seriedad menos pisa di e hecho, tocante un caso. Ora ta trata di turista esey ta hiba mayoria vez na transaccion. Ora di dicidi tocante un TOM e seriedad y tipo di e sospechoso ta wordo pisa enfaticamente.”
Den e relato aki cu Ministerio Publico a publica ta intenta di convence e comunidad Arubiano di nan decision pa no persigi un turista pedofil. E decision aki sigur uno cu a desapunta hopi y a laga pueblo cu mas pregunta embes di claridad riba e caso aki.
E impacto di e decision di Ministerio Publico ta manda e mensahe cu turistanan pedofil, esnan tin e manera financiero, por bin na nos pais haci deshaci cu muchanan y na final solamente mester paga un boet pa haya nan libertad.
Abuso sexual di mucha ta un trauma cu ta pa bida largo. Un trauma cu tin impacto severo y permanente riba e mente y curpa di un persona. E oficina cu mester persigi malechor ta mustra di ta extremamente ignorante pa e efectonan di abuso sexual. Si e oficina di Ministerio Publico tawata bon informa y tawata para pa derechonan/proteccion di mucha lo nan no tuma un decision pa libera asina facil un persona cu a haci daño na un mucha.
Ministerio Publico y nos Hueznan no tin un record di persigi y castiga severamente esnan cu ta abusa di mucha. Abuso sexual di mucha pa hopi siglo tawata un topico taboo y hopi actonan hororoso a bay sin wordo castiga. Awor cu ciudadanonan ta mas consciente y ta raporta e casonan aki na e instancianan concerni, Nan ta haya nan enfrenta cu un entidad judicial cu ta actua na un manera ignorante y inmoral.