Gobierno Spaño a aproba extradicion di ex-general di inteligencia Venezolano Hugo ”El Pollo” Carvajal. E ta wordo acusa di a asisti un transportacion di 5600 kilo di cocaina. Carvajal ta haye ta bay enfreta husticia Mericano y por ricibi un castigo di entre 10 aña pa bida largo den prison.
Na aña 2014 Aruba a detene Carvajal bou peticion di Merca. E ta wordo sospecha di a envolvi su mes hunto cu e grupo guerrillero di FARC pa asina trafica droga. E tawata percura pa cierto ‘proteccion’ di e cargacion di droga. Carvajal tawata encarga di preveni confiscacion di e cargacion di droga pa asina esaki por yega su destino, cu ta Merca.
Gobierno Venezolano a yama e detencion di 2014 como uno ilegal y cu ta viola e inmunidad diplomatico. E tempo ey Presidente Maduro a demanda pa Carvajal wordo libera. Apesar di e apoyo y protecion cu e a ricibi for di Presidente Maduro, na februari 2019 Carvajal a mustra di ta sostene e lider opositor di e gobierno Venezolano, Juan Guaidó. Carvajal a perde su puesto despues di a mustra publicamente cu e no ta sostene gobierno di Maduro.
Despues di esaki Carvajal a huy cu boto for di Venezuela y momento cu e a yega Madrid e a wordo deteni. Desde aña pasa e a lucha contra e extradicion di su persona. Carvajal ta nenga di a yega di involucra su mes den traficacion di droga.