ORANJESTAD – Dialuna atardi Minister di Salubridad Publico Sr. Dangui Oduber tabata presente na La Cabana Resort caminda a reuni cu AHATA. Esaki a bay den cuadro di concientisacion, transparencia y pa brinda e informacion na sector turistico. Aki e team di profesional di Departamento di Salud cu ta conseha Ministerio di Salubridad Publico con pa atende cu coronavirus a duna un presentacion na e miembronan di AHATA den un esfera hopi ameno.
Durante e intercambio ameno aki e representantenan di Departamento di Salud Publico a duna un presentacion di kiko e virus ta, kiko ta e consequencianan di e virus y con por preveni di wordo contagia cu e virus. A pone hopi enfoce riba e parti preventivo, tambe a pone hopi atencion riba e perspectiva y con serio e virus ta. E manera mas efectivo pa preveni coronavirus ta door di laba man frequentemente cu habon of haci uzo di un hand sanitizer.
Ora a haci un comparacion di coronavirus cu otro malesanan respiratorio cu tabata tin den pasado, manera measel, sars, influenza H1N1 y mears. Den tur e malesa contagiosonan aki esun cu tin e cifra di mortalidad mas abou ta coronavirus. Otro cos di remarca ta cu e coronavirus ta muri entre 2 y 5 dia den temperaturanan riba di 25 graden celsuis cual ta e caso den e clima tropical na Aruba, Na otro paisnan na munda caminda e temperatura ta mas frieuw e virus por keda bibo pa 2 siman of mas. Na momento di tende e hechonan aki den e presentacion esaki sigur a trece un sentido di alivio na e miembronan di AHATA.
A demostra tambe riba e cifranan di mortalidad den diferente categoria, aki a keda demostra cu cifra cu 14 porciento di personanan riba edad di 80 aña cu haya e coronavirus ta resulta fatal. Di otro banda personanan entre e edad di 1 aña te cu 50 aña e porcentahe ta practicamente cero. Actualmente tin alrededor di 86 mil persona afecta rond mundo di cual 3 mil a fayese y 36 mil a recupera di e virus. Si pone e cifranan aki den un averahe y perspectiva por conclui cu coronavirus su cifra di mortalidad ta alrededor di 2.5 porciento.
E preocupacionnan cu Hotel tabata tin ta cu si e testnan pa cu coronavirus por wordo haci aki na Aruba mes a mustranan cu esaki por wordo haci na Laboratorio di HOH mes y den menos cu 24 ora esaki ta bira conoci. Otro preocupacion tabata e screening nan na aeropuerto y na waf, aki Departamento di Salud Publico a informa e miembronan di AHATA di e proceduranan cu tin pa por cumpli cu e protocolnan internacional cu tin. Nan a puntra tambe kiko ta e medidanan di prevencion y precaucion cu nan mester tuma. Gobierno di su banda lo comparti tur e informacionnan pa asina nan informa tur nan trahadornan kiko a wordo presenta pa DVG. Esaki tabata e palabracion cu wordo haci, tambe nan lo keda den contacto estrecho cu ATA pa asina ATA por trecenan preocupacion dilanti den e crisis team.
