Diabierna 28 di februari 2020, RDA y Citgo a firma un ‘transfer agreement’ unda cu Citgo ta transferi e operacion di e refineria y terminal pa RDA. E transferencia a tuma luga diasabra 29 februari 2020.
Esaki ta e prome paso den e proceso pa, den un forma amical, termina e acuerdonan entre Citgo y RDA y Gobierno. E terminacion a bira necesario na momento cu a bira claro cu Citgo no por cumpli cu su obligacionnan mas pa motibo di sancionnan imponi pa gobierno mericano. Pronto Gobierno lo presenta un concepto di ley na Parlamento unda cu lo trata e terminacion di contractnan. Despues di esey lo cuminsa e proceso pa busca otro operador pa e terminal y refineria.
Pa prome biaha den historia, Pais Aruba, a traves di RDA y TDEA, ambos companianan estatal, lo opera e transshipment terminal temporalmente. RDA/TDEA lo ta encarga tambe pa preserva e refineria mientras cu Gobierno lo cuminsa e proceso pa busca un inversionista/operador nobo pa esaki.
Gobierno di Aruba a informa Parlamento di e desaroyo aki imediatamente diasabra atardi, y despues a invita prensa pa presencia e traspaso na gate di e refineria. E traspaso a bay na forma keto y sin mucho fanfaria, debi cu esaki no ta e terminacion di e contrato cu Citgo ainda, e terminacion por wordo efectua despues di aprobacion di Parlamento.
