Oranjestad – Diamars 21 di januari 2020 a tuma luga e di dos dia di workshop pa Studentenraad unit S&S di Colegio EPI cu ta trata Mediawijsheid. E topico riba e dia aki tawata fotografia y “create content on social media” cu a haya cooperacion di e oradornan Ayrton Tromp di ARTN Photography y Kimberly Maduro di Xclusivo Magazine.
Durante e atardi aki e studiantenan a haya informacion amplio tocante con pa saca potret di calidad, teniendo cuenta cu diferente aplicacionnan ariba e camera cu nan ta uza. Tambe nan a haya informacion con pa set un camera prome cu saca potret. Ayrton a trece diferente equipo di fotografia pa e studiantenan wak y asina amplia nan conocemento den e mundo di fotografia.
Kimberly Maduro di Exlusivo Magazine a duna informacion tocante crea contenido pa publica ariba media social. Studiantenan a haya un bista di tur locual mester tene cuenta cune prome cu crea contenido y tambe planea na momento di crea y publica contenido. Tambe Kimberly a conta tocante e importancia di “storytelling”. Na final e studiantenan a haya algun tools manera checklist, handouts y tambe apps cu nan por cuminsa uza den nan bida diario ariba e media social.
Begeleiders di Studentenraad di Unit S&S di Colegio EPI ta gradici Ayrton Tromp y Kimberly Maduro pa e informacion cu nan a comparti cu nos studiantenan. E studiantenan awor ta mas mihor prepara pa e uzo di social media y fotografia cu nan por pone den uzo pa e studentenraad yega mas cerca y interactua cu tur studiante.
