E siman aki e maneho di Innovacion di Gabinete Wever-Croes tabata centro di atencion na Puerto Rico durante un conferencia organisa pa Clinton Foundation. Chief Innovation Officer Varelie Croes a representa Aruba dignamente y a expone e vision di innovacion di Aruba. Varelie a enfatisa e necesidad di inclui innovacion den tur maneho poniendo e ser humano central. E presentacion di Aruba a ricibi hopi elogio door di esnan presente y mester remarca cu tabata tin hopi interes di inversionistanan den Aruba.
Premier Wever-Croes ta sigui reuni regularmente cu sindicato TOPA pa atende e temanan di personal di Gobierno pendiente. Poniendo e ser humano central.
Premier Wever-Croes regularmente ta reuni cu ex mandatarionan y ta aprecia e consehonan di esnan cu mas experiencia. E siman aki Premier a reuni cu ex presidente di Parlamento sr. Marlon Werleman riba e desaroyonan politico mas recien.
Consul di Republica Dominicano sr. Compres Rosario a haci un bishita di cortesia cerca Premier Evelyn Wever-Croes. Durante e encuentro Premier a trece padilanti entre otro e interes di parti di Aruba pa importa mas fruta y berdura for di Republica Dominicana pero cu e gastonan di transporte ta impedi esaki. Hunto lo traha riba formanan pa agilisa e proceso aki.
Minister Plenipotenciario na Hulanda sr. Besaril ta na Aruba y a reuni cu Premier. A toca varios tema di relacion entre Aruba y Hulanda y di bienestar di nos studiantenan na Hulanda. Tambe a reuni cu Departamento di Recurso Humano riba e reorganisacion di Arubahuis, pa modernisa e trabounan y haci nan mas eficiente.
Gianny’s Group a efectua e groundbreaking di un proyecto unico na San Nicolas, The Old Barbershop. Durante un conferencia di prensa Gianny’s Group a expresa nan confiansa den desaroyo di San Nicolas cu remodelacion di e edificio aki pa uzo comercial. Premier a felicita famia Ferara y a gradici nan pa nan confiansa. Gabinete Wever-Croes ta comprometi pa trece desaroyo den San Nicolas.
Mininister di Enseñansa a habri e siman haciendo e apertura di e bus tour educativo pa e muchanan di e klasnan di e scol na Macuarima cu a keda destrui. Juf. Olinda Rasmijn a guia e schoolreis siñando e muchanan tocante nos naturalesa, historia y cultura y a termina cu un charla di Juf. Dora Koolman kende a splica cu ex gobernador Olindo Koolman tabata alumno eynan y por ta tin un futuro gobernador sinta bao di e muchanan presente. Un initiativa di colega Glenbert Croes hopi aprecia.
Mininister di Enseñansa a reuni cu Edgenuity, cu ta ofrece programa di ‘homeschooling’ y estudio online, den cooperacion cu gobiernonan pa complementa e sistema educativo. Nos ta orguyoso cu un Arubiano, Ghislaine Dijkhoff, ta parti di e team internacional. Interesante ta cu ta ofrece algo pa enrikece nos scolnan existente y no pa reemplasa nan.
Mininister di Enseñansa a reuni cu e comision fiho di enseñansa di Staten y a duna un update di e ultimo desaroyonan y a contesta preguntanan di nos miembrionan di Parlamento.
Den mesun reunion di Staten Mininister di Enseñansa a presenta e miembronan di Stichting Helpdeschoolkinderen kende a biaha for di Corsou y Hulanda pa duna un presentacion na nos miembronan di Parlamento. Ministerio di Enseñansa ta coopera cu e fundacion aki pa trece articulonan di scol di segunda mano di Hulanda pa Aruba. Ya caba a ricibi tres container cu materialnan casi nobo, cu ta scapa Gobierno basta placa si mester a cumpra nobo.
E siman aki tambe a entrega na scolnan piloto e instrumentonan musical di Stichting Leerorkest y na fin di aña escolar e muchanan lo presenta nan prome concierto.
Mininister di Enseñansa a reuni cu San Nicolas Business Association pa papia di tur e plannan di educacion pa San Nicolas y Mininister di Enseñansa a bishita e oficinanan cu Enseñansa pa Empleo a pone disponibel pa educacion den curason di San Nicolas.
A cera e siman cu un reunion di Mininister di Enseñansa cu directiva y rector di Universidad di Aruba y entre otro a papia di establecimento di Universidad di Aruba pa cierto programa na San Nicolas.
Durante e ultimo simannan a tuma nota di preocupacionnan di Sichting Parkietenbos den medionan di comunicacion tocante dump, pa cual Minister Lopez-Tromp a invita e fundacion pa un reunion cu a tuma luga e siman cu a pasa. E reunion tabata riba e tema di maneho di desperdicio y preocupacionnan cu tin. E encuentro a tuma luga conhuntamente cu Prome Minister y na e ocasion, e representantenan a mustra riba e accion di firma andando contra e molester causa como consecuencia di dump, cu te cu aworaki ta conta cu mas cu 2000 firma. Gobierno tambe na su turno a splica di e esfuersonan cu ta haciendo
Den e siman tambe Minister Lopez-Tromp a reuni cu FCCA y a haya un presentacion di e plannan pa e aña aki y otro aña pa loke ta e casnan cu ta bin den futuro.
Den e reunion a atende cu e aspecto di coordinacion di e diferente proyectonan aki y a entrega e Landsbesluit di e 512 casnan cu e habitantenan ta bay bira doño di dje. Pabien na cada famia!
Diahuebs a tuma luga bishita na DIP pa mira e desaroyo di e trabounan tumando luga na e infrastructura parti paden di e edificio. E cambionan aki ta tumando luga pareu cu e automatisacion di DIP, pues comunidad por spera un miho servicio y eficiencia unabes cu e trabounan termina.
Ta recorda comunidad cu e oficina di DIP ta cera pa publico actualmente, pero por bishita e pagina di Facebook di DIP pa e email y number di telefon di contacto.
Diabierna e contratista a haci entrega di e proyecto di renobacion di Uncle Louis Store. Alabes e yabinan a wordo entrega na e departamento di naturalesa y medio ambiente cu lo ubica den e edificio. E monumento aki ta esun mas sostenibel riba e isla considerando e diferente aspectonan cu a tene cuenta cu ne manera e panelnan solar y e diseño parti paden. Pabien henter comunidad cu un monumento mas cu a wordo restaura y specialmente e pueblo di San Nicolas, cu e bunita edificio historico aki.
Comienso di siman Minister di Husticia, mr. Andin Bikker, a ricibi un carta for di Hulanda cu e grato noticia cu Hulanda ta bay haci transferencia di fondonan aloca pa entre otro reenforsa e vigilancia di costanan di Aruba. Den presupuesto di Hulanda aña pasa a aloca fondonan substancial pa yuda paisnan manera Aruba y Corsou pa reenforsa e vigilancia na costa y atende cu otro retonan cu ta existi door di e situacion regional sin precedente. Ministerio di Husticia lo bay ta lider den diferente proyecto piloto cu ta bay cuminsa den e cuadro ey y lo bay inicia mesora cu e plannan acorda.
Minister di Husticia diamars siman pasa tabata den conferencia di prensa unda e mandatario a desmenti noticianan falso cu tabata circulando riba social media den cual den esencia tabata bisa cu lo a pone beslag na Aeropuerto Reina Beatrix riba un cargacion di oro di 932 kilo procedente for di Venezuela. Minister Bikker a desmenti e noticianan aki: no tin beslag riba un supuesto cargacion di oro di 932 kilo procedente for di Venezuela y pues no tin detencion of proceso di extradicion andando. Minister Bikker a recorda ademas cu nos ta biba den un pais democratico cu institutonan independiente y ningun momento a prohibi ningun autoridad di papia riba e tema. Ministerio Publico tambe a emiti un declaracion riba e tema desmintiendo e noticianan falso en cuestion.
Minister Bikker a indica cu, a base di protocol firma cu Sindicato di Polis (SPA) y apelacion di otro Sindicatonan, tin intencion pa a corto plaso cuminsa cu un proyecto piloto di ‘Advies Commissie Mediation en Ambtelijke Heroverweging’. E comishon lo bay promove mediacion y/of duna conseho pa re-evaluacion (“ambtelijke heroverweging”), pa asina pa medio di e proyecto piloto explora e posiblidad di resolucion alternativo (“alternative dispute resolution”) pa tur empleado publico cu kier haci un apelacion riba e comision.
Un otro tema durante e conferencia di prensa di Minister Bikker tabata e grato noticia cu Aruba a haya varios instrumento for di Hulanda pa Leerorkest Aruba. Tabata na April di 2018 cu Minister Bikker a propone un “Letter of Intent” cual a wordo firma hunto cu Minister di Husticia di Hulanda, Prof. dr. Ferdinand Grapperhaus y colega Minister di Enseñansa, sr. Rudy Lampe, pa insitui un Leerorkest pa Aruba. E instituto di Leerorkest ta duna studiantenan e oportunidad pa durante of despues di scol haya educacion gratuito di musica, pa cual meta e instrumentonan a yega como donacion for di Hulanda.
Diaranson Minister Bikker a gradici y felicita un grupo grandi di personal di KIA cu a cumpli 30 aña trahando na e Instituto. E hubilarionan a cuminsa traha den e temporada cu KIA a keda inaugura. Manera conoci awor Minister Bikker ta bezig cu un proceso pa yega na un Instituto Coreccional nobo.
Diahuebs Minister Bikker tabata na Corsou pa asisti y hiba discurso na apertura di e ‘Caribbean Centre for Legislation’ y instalacion di un ‘Bijzonder Hoogleraar Wetgevingsleer’, Prof. dr. Sjoerd Zijlstra. Durante e apertura Minister Bikker a haya amplio reconocimento pa su esfuersonan desde 2014, for di su tempo como Parlamentario, pa por yega na introduci un Academia di Ley. Minister Bikker a gradici pa e reconocimento y a aplaudi e introduccion di e Caribbean Centre for Legislation y e instalacion di Prof. dr. Sjoerd Zijlstra como Bijzonder Hoogleraar Wetgevingsleer.
Durante e cumbre di Ministernan di Husticia (‘Justitieel Vierlanden Overleg’) di juli 2019 a palabra a base di proposicion di Aruba cu ta bay busca cooperacion riba e tema aki. Den su discurso diahuebs Minister Bikker a recorda cu leynan por wordo compara cu ‘software’ di un pais y p’esey ta importante pa amplia e capacidad di specialistanan cu por yuda traha conceptonan di ley, pa asina por actualisa nos leynan mas pronto cu ta posibel. E mandatario su meta ta pa prome cu 2020 termina, den cooperacion cu Ministerio di Enseñansa, Universidad di Aruba y e Caribbean Centre for Legislation, lo por bay ofrece cursonan riba e tereno di ‘Wetgevingsleer’.
Celebracion di Carnaval 66 a yega su culminacion y Aruba a celebra carnaval grandemente. Pabien na tur participante, lider di grupo, musico y carnavalistanan. Danki pa engrandece nos carnaval.