Gobierno mester atende cu e sentimento di pueblo pa cu desaroyo di Turismo pa ni local ni bishitante sinti nan menosprecia.
Oranjestad: segun Parlamentario Arends-Reyes nos Turismo tawata riba pia y stabil na 2017 cu desaroyo na beneficio di comunidad y bishitante pero actualmente mester accion y atencion urgente pa cu Turismo. Aruba a yega na un punto caminda cu Turismo, bienestar di comunidad y pais mester keda den balansa, Aruba no por sigui den e trend di sigui ta satisfecho cu volumen y crecimento riba crecimento y no ta prepara pa e impacto cu esaki tin, no kier scucha kiko e turistanan ta bisando, nan kier wak ‘value for their money’ y mas ainda e paz y trankilidad na cierto atracionan y sitionan ta cabando y ta papia di ‘overcrowding’ cierto camindanan, beachnan y orarionan, comunidad na su turno tambe ta cuminsa reclama y tolera menos di actitud tin biaha di nos bishitantenan. Na momento cu pueblo ta sinti cu nan lugar y espacio ta wordo limita y ta reclama esaki y ta sinti cu gobierno no ta hasi nada pa atende cu e sentimento aki, pueblo ta sinti cu no tin oido pa nan.
Sin conta e hobenan cu ta cabando nan estudio riba nivel di mbo cu ta buscando trabou den Turismo no ta logrando pero e topico aki sigur tambe tin atencion di sra Arends-Reyes. Nos economia ta depende riba Turismo awor mas cu nunca mirando cu no ta treciendo proyectonan concreto pa Aruba pa diversifica, pero na mes momento si no tuma accion awor y trece e balansa entre espacio y reglanan pa comunidad y bishitante, ningun di dos lo sinti nan mes mas na cas mas of por tin e sentimento cu nan no ta bon bini y lo emigra of den caso di bishitante lo simplemente busca un otro destinacion. Calidad vs cantidad mester bira realidad mas cu nunca mirando cu e mercado di Aruba lo nivela mientras cu region ta recupera di e catastrofenan natural di 2017. Y nos a cuminsa wak esaki den e indicadornan manera caida di room occupancy y REVPAR.
Awor mas cu nunca ATA cu su dos pechinan di mercadeo y atraccion y maneho di destinacion tin cu laga su voz pa maneho di destinacion local resona. Nan tin diferente estudio hasi pero gobierno no ta implementando nan conseho. Parlamento no ta ricibi sesionan mas cu stakeholders importante di Turismo y mayoria di preguntanan oficial no ta wordo contesta. E presupuesto di ATA no a yega Parlamento ainda, tampoco informacion tocante e cantidad final di fondonan di emergencia cu lo ser uza pa 2020 y con a para cu e urgencia di DOW di 12.6 miyon pa e ‘repair e oxidation ditch y e aeration system’ na e ‘riool water zuiverings instalatie’ di Bubali pa por garantisa e eficacia di e capacidad pa filter e awa sushi y percura pa e awa no hasi daño na e bida marino. Sra Arends-Reyes lo keda vigilante ariba e desaroyonan tocante e peliger di un Turismo desbalansa.