Home History of Aruba Historia di Aruba: Accidentenan fatal cu a pone gobierno di Aruba cera...

Historia di Aruba: Accidentenan fatal cu a pone gobierno di Aruba cera un crusada den menos cu 24 ora

SHARE

Camindanan y crusadanan na Aruba a conoce hopi accident, algun caminda cu e bieunan tabata yamanan camindanan bejaco, crusadanan caminda hopi hende a perde nan bida y cu gobierno e tempo aya a duna ordo pa cera e camindanan aki.


E caminda di Boulevard dilanti Eagle Beach, unda antes tabata un crusada tambe a wordo cera.

Den e ultimo decadanan a cambia varios crusadanan peligroso pa  rotonde, pa asina trata na haci e trafico na Aruba un poco mas sigur.

Den añanan 70 pa 80 Aruba a conoce hopi accidente di trafico, varios tabata accidentenan hopi cruel, fatal y hopi tristo. Famianan tabata wordo ranca for di otro door di accidentenan di auto. Mayoria tabata hobennan cu tabata perde nan bida den accidente.

E biaha aki nos lo dedica den Historia di Aruba, na un caminda cu a wordo cera mesora despues di un accidente hopi tristo y  tragico cu a conmove henter Aruba. Un accidente sigur cu lo a wordo lubida pa hopi, nos ta campa eynan, nos ta cana eynan y nos ta staciona nos auto eybanda. Sin corda of no sa cu eynan mes na Eagle Beach, den menos cu dos siman 4 hende a perde nan bida tragicamente.

E crusada di Eagle pa bay hospital, e crusada aki tabata recientemente habri y varios accidente a cuminsa sosode. Ni cuanto borchi D.O.W. a pone e automobilistanan no tabata pone bon tino riba e caminda aki y tabata subi caminda sin duna otro preferencia.


E crusada di Eagle pa bay hospital

Hopi hende a critica e crusada aki. Tambe e corant local di e tempo ey Promé na varios ocasion a adverti gobierno cu e crusada aki ta hopi peligroso, ta pasando varios accident na e crusada aki y ta nan tabata pidiendo pa haci algo prome cu e baca hoga. Pero e baca  e tempo ey mester a hoga prome cu a actua.

Esaki no tabata e unico accidente fatal na e crusada aki, pero esaki ta e prome accidente fatal despues di tanto advertencia y critica di e crusada peligroso aki. 

Eagle: Diahuebs 18 di November 1976, den careda di 9’or di anochi, e Chef Cook di Holiday Inn Hotel, Siegfried Eckhart tabata tras di stuur di su auto mericano, e tabata biniendo for di pariba (for di direccion di Hospital). Siegfried a subi caminda sin duna preferencia na e auto cu tabata biniendo riba e caminda di preferencia esta di L.G. Smith Boulevard bayendo direccion panort. Den e otro auto tabata tin un supervisor di e mesun hotel caminda Siegfried tabata trahando. 


E crusada antes unda e accidente a sosode den cual Siegfried a perde su bida

E impacto tabata na banda di chauffeur. E tabata asina fuerte cu Siegfried a wordo saca for di auto. Ela wordo transporta den un situacion hopi critico y cu hopi urgencia pa hospital, pero na yegada lamentabelmente ela fayece. Dr. Middelburg a constata morto di Siegfried Eckhart naci na Alemania, dia 19 Februari 1938.  Siegfried a cuminsa traha na Holiday Inn dia 15 di maart 1975.


E auto di Siegfried Eckhart despues di e accidente fatal

Un biaha mas corantnan local a bolbe bati alarma pa yama atencion di gobierno di e tempo ey, pa haci algo cu  e crusada aki  prome cu e baca hoga y mas morto cay.


E corant Arubiano ‘Promé’ na varios ocasion tabata manda advertencia pa gobierno cu e crusada aki ta hopi peligroso

Dia 30 di November 1976, e baca a caba di hoga por completo.

EAGLE: Tabata Diamars 30 di November 1976, algo prome cu 3’or y mey di atardi. Famia Boekhoudt, un tata cu 5 yiu tabata riba caminda pa bay mira un familiar, segun nos a wordo informa pa famia, tabata trata di un tanta, un ruman di e tata cu tabata interna na hospital. E tata tras di stuur y su yiunan compañando nan tata den auto, e famia tabata den un Datsun.

Na e crusada nobo riba Boulevard dilanti Eagle beach, e tata a bay lora pa bay direccion di hospital, sin pone tino cu na su man drechi (for di Oranjestad) tabata biniendo un Stationwagen Ford Torino. E auto aki a dal hopi duro contra e Datsun di famia Boekhoudt.


E Datsun di e famia despues di e impacto, polis y varios alto mando policial tabata na e sitio


Polis yudando y brandweer cortando e auto pa asina saca e yiu muher mayor di Cornelis, cu a keda un 50 minuut ney pega den e auto.

E impacto tabata sumamente fuerte cu tres di e ocupantenan a perde nan bida. E tres otronan a keda herida y a wordo hiba cu urgencia pa hospital.

E tata tabata yama Cornelis Boekhoudt, ela muri yegando Hospital. E otro victima tabata e yiu muher grandi Glenda, ela keda mal pega den e auto, a dura casi 50 minuut pa polis y brandweer por a libera Glenda for di den e auto. Den careda di 6’or di atardi dokter a constata morto di Glenda Jansen Boekhoudt.

E yiu muher chikito na bida yama Mirtha Boekhoudt tabata tin apenas 8 aña di edad, e criatura aki tampoco a sobrevivi e accidente aki. Mirtha a fayece den careda di 4’or y 20 di atardi. E tabata un accidente hopi tristo, no solamente pa e famia, pero a sacudi henter e pueblo di Aruba y te hasta e gobierno di e tempo ey.


Polis dunando e prome assistencia y por mira hopi mirones para canto di caminda. E tempo ey No tabata tin Celular y mucho menos whatsapp, pero e noticia di e accidente aki a bay hopi lihe rond

E tempo ey Deputado Daniel Leo (dfm) tabata indigna cu loke a pasa, paso diabierna 26 di november 1976, Bestuurscollege a tuma e desicion caba cu e crusada aki mester a wordo cera mesora y a manda ordo pa cer’e. Lamentabelmente e ordo no a wordo cumpli mesora y a laga e baca hoga. Despues cu tres persona a perde nan bida, a core bay cer’e siendo cu e accidente aki lo por a wordo evita, si esnan cu tabata responsabel e tempo ey pa cera e crusada a sigui e ordo cu a bin di halto y a cumpli cu esaki e Diabierna anterior.


E caminda cu a wordo cera dia 1 di December 1976

Dia 1 di December 1976, Gezaghebber di Aruba tambe mesora a duna ordo pa cera e crusada aki. Esnan cu mester bay hospital lo mester a haci uso di e caminda paden di Eagle te ora a bin cu un solucion, pero via e caminda aki no por a bay hospital mas.  E crusada aki a keda pa decadanan cera. Actualmente e ta habri, pero solamente autonan cu bin di pazuid riba J.E. Irausquin Boulevard por lora bay pariba. Autonan cu bin di pariba por lora bay direccion panort riba J.E. Irausquin Boulevard.

No ta solamente e accidente fatal, pero e entiero tambe, di e tata cu su dos yiunan tabata hopi tristo y a causa un impacto fuerte riba e pueblo. Na bida Mirtha, e yiu muher mas chikito tabata pega riba su tata, e tabata e pret’i wowo di su tata.  Dia di entiero tur tres a wordo dera hunto, pero Mirtha a wordo poni den e mesun caha cu su tata, ela bay dera den brasa di su tata. Un entiero cu a kibra curason di hopi y cu esnan cu a conocenan of a bay nan entiero hamas lo por a lubida e entiero conmovedor aki.


Entiero conmovedor di famia Boekhoudt

Nos di Arubanative.com no conoce e famia Boekhoudt aki, pero si lesando y buscando informacion di e crusada aki, e parti di e accidente den cual famia Boekhoudt tabata envolvi a conmove nos hopi.

Un famia humilde di Cashero. E tata tabata traha na D.O.W. Un famia di mama, tata y 9 yiu. Nan destino a cambia y tres di nan, nan bida a caba den un frega di wowo. Un dama di 18 aña cu lo tabata tin soñonan pa futuro hunto cu su casa y su baby cu ela laga atras di 7 luna. Un dama cu tabata yen bida a wordo cruelmente ranca for di e mundo aki. E otro ruman muher di apenas 8 aña, cu un bida su dilanti, un angelita cu a bay demasiado lihe for di e mundo aki. E tata un homber trahado cu lo tabata stima y percura pa su señora cu su yiunan tambe a wordo ranca for di nan.

E pregunta cu a keda habri con su señora, y su 7 yiunan cu a keda atras, con nan bida a sigui despues cu nan a perde tres ser keri den un solo biaha y na un forma hopi cruel.

Algun fuente: Corant Prome y Amigoe di Curacao