Segun Premier Evelyn Wever-Croes, Presupuesto 2020 di pais Aruba, ta uno hopi special, esaki debi cu ta pa prome biaha den hopi aña, Aruba tin un presupuesto cu un surplus. Apesar di e gastonan adicional enormemente grandi di aña pasa compara cu e aña aki, Gabinete Wever-Croes a logra un surplus den Presupuesto 2020.
Ta importante, Prome Minister ta enfatisa, pa para keto na e gastonan adicional pa aña 2020 y realisa kico Aruba ta bay paga adicionalmente compara cu aña 2019.
- INTERES: 50 Miyon florin adicional na interes debi cu e gobierno anterior a redobla e debe di nos pais.
- Proyectonan PPP: 18 Miyon florin mas cu e gobierno anterior a mara nos generacion y futuro generacionnan cu ne.
- AZV: 12 Miyon florin adicional pa gastonan relaciona cu AZV no solamente cu gastonan medico den exterior pero especialmente gastonan medico na Aruba mes.
- INVERSION: 20 Miyon florin pa sigui inverti den mehora e calidad di bida di ciudadano di Aruba.
- GASTONAN REGULAR DI GOBIERNO: 5 Miyon florin mas cu aña pasa.
E gastonan adicional pa aña 2020 ta suma un total di 105 miyon florin. Apesar di esaki, Gabinete Wever-Croes a logra cera e presupuesto 2020 cu un surplus. Esaki a logra door di un balansa di entradanan adicional di impuesto cu no ta crea un peso pa nos comunidad y un balansa di otro tipo di entradanan.
“Di e manera aki, nos Gobierno ta atende cu e situacion financiero dificil cu e pueblo di Aruba a hereda di e gobierno anterior. Un herencia dificil pa asimila y acepta, pero e ta e realidad. Gabinete Wever-Croes no ta esun cu a causa e problemanan financiero di nos pais, pero nos ta soluciona nan si y brinda nos pais un miho presente y un miho futuro”, Prome Minister Evelyn Wever-Croes a enfatisa.
