Departamento di microbiologia di LABHOH a traha duro y awe orguyosamente por anuncia cu na Aruba y e islanan Hulandes Caribense ta e prome cu a logra traha riba un test pa asina por diagnostica si un persona ta contagia cu e Coronavirus ( COVID-19). Pues awo nos na LABHOH por realisa localmente e test pa e virus cu tanto angustia ta causando mundialmente.
LABHOH tin e aparaturanan di mas moderno riba e isla y pues e profesionalnan a logra den un corto tempo pa hinca e test aki den otro. Manera cu un pashent yega Hospital y tin sospecho cu e por ta contagia cu e Coronavirus ( COVID-19) di biaha ta isola e pashent, personal di Hospital ta sigui e protocol manera debe ser y LABHOH ta hasi e test cu e pashent. Den 24ora ya por duna resultado si e pashent ta of no ta contagia cu e Coronavirus ( COVID-19).
E test aki ta solamente obtenibel pa personanan cu ta cumpli cu e rekisitonan stipula pa World Health Organization (WHO) cu ta duna e sintomanan exacto ki ora tin e sospecho cu e persona por tin e Coronavirus.
Un bes mas LABHOH a demonstra den corto tempo cu un test diagnostico asina complica, cu nan por competi cu e miho laboratorionan Mericano y Europeo.
Pabien LABHOH y pabien Aruba cu e logro aki!