Oranjestad – Recientemente Departamento di Finansa a brinda un tayer riba reglanan presupuestario na tur empleado publico encarga cu finansa di Pais Aruba. Minister Maduro a subraya cu esaki ta necesario pa asina por implementa e reglanan presupuestario cu a keda acorda den e Protocol cu Gobierno a cera cu Hulanda na november 2018.
Despues cu Gobierno a yega na un acuerdo cu Hulanda riba e caminda cu lo cana pa e recuperacion financiero di Pais Aruba, na nivel departamental mester a traha riba e reglanan di implementacion di locual a keda acorda.
Esaki a tuma su tempo y na december 2019 Aruba y Hulanda a keda cla cu esaki. E tayer ta brinda informacion y guia na tur hefe di departamento, tur empleado publico encarga cu finansa y tur coordinador di presupuesto di e diferente ministerionan, riba e reglanan pa e ehecucion di presupuestonan 2020 y 2021 den concordancia cu e Protocol di november 2018.
Durante e tayer a trata e reglanan cu ta toca separacion di entrada y gasto, limitacion di proyecto PPP, reglanan di compensacion pa perdida inespera y reglanan pa entradanan inespera (meevallers/tegenvallers beleid).
Minister Maduro encarga cu e cartera di Finansa ta gradici e funcionarionan di Departamento di Finansa pa e tayer y e guia. Alabes e mandatario ta gradici tur empleado publico pa nan participacion y nan esfuerso di tur dia pa maneha y mehora e finansa publico di nos Pais.
