Diadomingo awo ta e ultimo evento di Carnaval cu e parada di mucha na Oranjestad. Prome Minister Evelyn Wever-Croes ta desea nos muchanan cu ta participa y cu ta para na banda pa disfruta di e bunita creacionnan riba caminda, un dushi Carnaval di mucha.
Diabierna mainta, Prome Minister a haci algun bishita importante relaciona cu cuido di oido di nos muchanan. Entre otro, Prome Minister a bishita Scol Basico Dornasol pa asina regala cada alumno di e scol un earplug. Prome Minister a enfatisa e importancia pa uza earplugs cerca e muchanan cu ta bay Carnaval sea pa wak of pa disfruta na banda. Semper mester proteha oido di muchanan di e zonido fuerte di musica cu lo por causa daño no reparabel na nan oido.
Ta importante pa keda enfatisa e importancia riba cuido di nos muchanan durante temporada di Carnaval especialmente nan oido cu ta loke ta conecta nan cu e resto di mundo pa semper. Unabes cu perde oido, nunca mas esaki lo por wordo restora.
Docentenan y muchanan di Scol Basico Dornasol a keda hopi contento cu bishita di Prome Minister cu a desea nan tur un dushi temporada di Carnaval y pa protege nan oido cu earplugs.
