Parlamentario Endy Croes a bay hopi amplio durante reunion publico unda a trata e rapport di Algemene Rekenkamer “Bo Aruba”. Bo Aruba ta proyectonan di Mike Eman y Benny Sevinger di AVP cual ta trata di 10 hoofdprojecten y 241 deel projecten pa un total di 1.6 biyon, esta 1600 miyon florin y di cual 1000 miyon florin a wordo otorga caba.
Falta masha hopi documento y a peca diferente biaha contra nos propio leynan. Citando un parti di e rapport riba pagina 67: “in een of andere gevallen van deze onderhandse aanbestedingen is er geen ministeriële beschikking aangetroffen. In twee gevallen is er slechts concept- ministeriële beschikking aangetroffen”. Algemene Rekenkamer ta termina bisando: “Bij het uitblijven van de opstelling van een ministeriële beschikking wordt in strijd gehandeld met de bepaling van de CV 1989”.
Pues ta comproba cu Benny a actua contra ley di contabilidad entre otro art 26 CV 1989. Esaki ta castigabel. Parlamentario Endy Croes a bay basta detaya riba e contenido di e rapport. Rapport di Algemene Rekenkamer ta devastador pa AVP y Benny Sevinger. A ilustra hopi profundo e manera corupto cu gobierno di Mike Eman y AVP a maneha Aruba. No tabata tin informacion ta bay pa Staten. Pues Staten dificilmente por a controla. Asina Baba Herde y demas Parlamentarionan di AVP tabata tapa pa corupcion por a tuma lugar. Oposicion a manda pidi informacion pero tabata wordo bulldoze door di Parlamentarionan di AVP.
Parlamentario Endy Croes a splica cu e mes a manda carta pa Ministerio Publico cu copia di e rapport pa puntra nan opinion. Ministerio Publico lamentablemente NO a contesta Parlamentario Croes te cu awe. Parlamentario Croes ta urgi gobierno mediante un mocion cu Fraccion di MEP a entrega pa entrega keho oficial como gobierno na Ministerio Publico pa investigacion por cuminsa. No por ta asina cu un “gang” di AVP ta horta e lugar aki y Benny Sevinger ta grita den sala I don’t give a damn! Esaki ta demostra e calidad di hende cu pueblo a duna confiansa pa goberna nos pais 8 aña largo. Pa corigi esaki nunca pero nunca mas AVP por regresa den gobierno.