Home » Durante un biahe cortico na Colomiba: PROME MINISTER TAWATA TIN DIFERENTE REUNION IMPORTANTE

Durante un biahe cortico na Colomiba: PROME MINISTER TAWATA TIN DIFERENTE REUNION IMPORTANTE

by Admin
0 comment 74 views

 

 

Siman pasa, Prome Minister Evelyn Wever-Croes tawata na Colombia pa algun dia pa motibonan priva. Como un mandatario responsabel, trabounan ta sigui unda y den cua situacion cu e por wordo haya den dje. Durante su biahe recien pa Colombia, priva y riba propio gasto, Prome Minister a probecha pa pone riba su agenda algun reunion importante. 

 

Prome Minister Wever-Croes a reuni cu Embahador di Reino na Bogota sr. Jeroen Roodenburg y cu Presidente di Holland House na Colombia, sr. Jan Willem van Bokhoven. A elabora riba varios tema di interes comun, especialmente riba comercio. Con pa probecha mas di relacionnan comercial entre Aruba y Colombia. Aruba ya caba ta un partner hopi importante pa Colombia pa loke ta trata exportacion di Colombia. Pa Aruba Colombia tambe ta un partner hopi importante pero ainda tin hopi mas potencial pa desaroya hunto. Prome Minister a presenta e Vision Economico 2019-2021 di Gobierno di Aruba. Colombia por hunga un papel importante den esaki y hunto lo explora tur posibilidad pa desaroya lasonan entre Aruba y Colombia. 

 

Prome Minister a reuni tambe cu CEO di Avianca Airlines sr. Anko van der Werff. Avianca ta un partner importante pa desaroyo turistico di Aruba y den transporte di pashentnan buscando nan salud na Colombia. Sr. Van der Werff a informa cu nan lo amplia e cantidad di vuelo entre Colombia y Aruba pa dos biaha pa dia y lo yuda desaroya un hub logistico na Aruba. 

 

Tambe Prome Minister a reuni cu Presidente di Colombia, Iván Duque. Desde nan encuentro na Panama na juli aña pasa, Presidente Duque a haci un invitacion na Prome Minister Evelyn Wever-Croes. E audiencia aki cu Presidente Duque a wordo concretisa ora cu Prome Minister a informa embahada cu e lo ta bay ta na Colombia. Prome Minister a indica cu Presidente Duque semper a mustra hopi interes den Aruba y tambe ta considera Aruba como un partner importante siendo Aruba e number 7 riba e lista di exportacionnan di Colombia. Hulanda ta number 4. Esaki ta mustra e importancia cu Aruba ta pa Colombia. 

 

Premier y Presidente Duque a delibera riba varios tema di interes mutuo, especialmente e mandatarionan a enfatisa cu e dos paisnan mester estrecha lasonan mas y traha riba mas intercambio comercial, entre otro riba tereno di salud, turismo y cultural pa asina crea mas oportunidad y alivio pa ambos comunidad. 

 

Riba e tema di turismo, Presidente Duque a pidi pa Aruba desaroya un programa pa yuda nan studiantenan riba e tereno di Horeca pa nan bin aki y pasa nan ‘stageperiodo’. Prome Minister a papia riba nan scol di ofishi, CENA, na unda nan ta prepara nan hendenan pa trabounan. 

 

Riba tereno di crimen organisa, a enfatisa cu Aruba y Colombia mester traha hunto pa trece mas siguridad pa ambos pais. 

 

Premier Wever-Croes a expresa su preocupacion pa cu e situacion na Venezuela y e retonan pa nos paisnan. El a expresa cu Aruba lo kier traha mas hunto pa combati crimen organisa. 

 

Riba tereno di cuido di salud tambe e mandatarionan a intercambia di ideanan con pa crea mas posibilidad. Gobierno di Aruba su meta ta pa mehora cuido di salud pa ciudadanonan di Aruba y mes momento baha gasto medico. Colombia ta hopi importante den e spectrum di cuido medico y Colombia ta keda un partner hopi importante pa Aruba den e tereno medico. Pa loke ta trata acreditacion pa studiantenan cu ta studia medicina den region, e Minister di Salubridad ta hopi leu cu esaki y e siguiente paso ta pa atrae establecimento di clinicanan priva na Aruba despues cu tin tur legislacion na su luga pa garantisa calidad.

 

Presidente Duque a bin cu un iniciativa di ‘Comite Bi-Nacional’ den cual Colombia y Aruba lo scoge algun tema comun y yega na areglo riba nan. 

 

Prome Minister a duna di conoce cu tawata reunionnan importante cu hopi intercambio di informacion y idea cu Gobierno lo traha riba nan y asina lasonan entre Colombia y Aruba bira mas firme. 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio