Ministerio Públiko a dagfar un makelar ku na mas ku un okashon a keda sin hasi un investigashon kompletu di kliente (Customer Due Dilligence) i ku na mas ku un okashon no a hasi investigashon di e fuente di e medionan ku ta wòrdu usa na momentu di hasi transakshonnan den propiedat inmóbil.
No ta permití pa hasi servisionan pa klientenan anónimo, pues pa e motibu ei un makelar ta obligá pa promé ku e duna su servisio, hasi un investigashon di kliente. A base di e investigashon di kliente e makelar mester haña un bista den ken e kliente ta i ku ken e ta hasi negoshi. No solamente e identifikashon ta di importansia den e kaso aki. Un aspekto importante di e investigashon di kliente ta tambe e investigashon di ‘source funds’. Resultadonan di e investigashon aki ta elemento importante den e investigashon di kliente ku por hiba na mèldumentu di transakshonnan inusual na FIU (Financial Intelligence Unit Curaçao, ántes MOT) komo un indikashon di labamentu di plaka.
Makelarnan i notarionan ta obligá pa hasi investigashon di kliente i pa mèldu transakshonnan inusual na FIU. Si e organisashonnan aki faya di hasi esaki deliberadamente, nan ta hasi nan mes kulpabel na un delitu. FIU tin supervishon riba kumplimentu ku e reglanan aki. FIU a hasi investigashon serka diferente makelarnan i notarionan i a konstatá defisiensianan. FIU a hasi denunsia riba esaki na Ministerio Públiko. Ministerio Públiko a ofresé e sospechosonan den e kasonan aki, un kombersashon di transakshon i esakinan a hiba na butnan di Naf. 12.000 i Naf. 15.000. E transakshonnan aki ta resultado di e ‘niet-melders project’ ku a kuminsá na mart 2017. Un di e makelarnan no a paga su transakshom i awor a dagfar e.
Banda di e sektor finansiero, makelarnan i notarionan ta algun di e dunadónan di servisio ku tin e deber di mèldu. Otronan ta hoyero, negoshantenan di outo i kompanianan di ‘online gambling’ (wega di plaka riba intèrnèt). E dunadónan di servisio aki por ta tambe dunadónan di servisio finansiero, kual ta indispensabel den atendementu ku labamentu di plaka i pa e motibu ei ta importante pa nan tambe kumpli ku nan obligashonnan legal.
Den kaso ku organisashonnan keda sin hasi investigashon di kliente, mèldu transakshonnan inusual òf hasi esaki lat, esaki lo mina i ta kousa konkurensha ilísito. Ademas, pa motibu di esaki, nan por fasilitá labadónan di plaka kriminal. FIU, den koperashon ku Ministerio Públiko lo sigui pidi atenshon pa ehekushon di e investigashon di kliente i e mèldumentu di transakshonnan inusual serka FIU.
Pa mas informashon tokante registrashon i mèldumentu na FIU por subi riba www.fiucuracao.cw.