Segun Parlamentario Richard Arends (AVP) Ni pueblo y ni comercio sa kico ta na caminda

“Ya nos ta den e prome siman di luna di februari y ainda nada riba presupuesto 2020, nada ainda riba reforma fiscal y ora cu nos papia cu pueblo y papia cu comerciantenan, tur hende den un incertidumbre riba e aumento di impuesto cu ta speranan”, asina Parlamentario Richard Arends (AVP) a bisa durante e conferencia di prensa semanal di e partido berde.
Inversionnan no ta tumando luga, caminda empresanan cu kier haci gastonan pa mehora na producto y servicio of pa tuma mas hende den servicio tin tur cos wanta. Tur e plannan aki ta para pa motibo di e incertidumbre cu ta reina ya cu pueblo ni comercio sa kico por spera nan den e aña nobo aki riba tereno fiscal.
Por scucha yen di cos, riba caya y for di gremionan. Ya caba fraccion di AVP a manda dos carta caba, tanto na luna di december y luna pasa, puntrando gobierno pa splica Parlamento den un forma conciso te hasta, kico ta spera tur hende cu e 13 leynan cu mester wordo cambia bou di e capa di reforma fiscal y cu ta na Raad van Advies awor.
Ainda nos no a haya contesta for di Gobierno, caminda cu for di aña pasa tabata tin oportunidadnan den Parlamento caminda gobierno a opta pa no duna contesta riba e preguntanan cu nos a haci y pa no adelanta riba e discusionnan aki, lagando Parlamento atrobe den desconocimento por completo.
Unico cos cu nos sa ta cu e di dos fase di e reforma fiscal ta un aumento di impuesto pa pueblo, comercio y turistanan, segun e conseho di e Colegio di Supervision Financiero pa Aruba (CAFT) ta bisa literalmente. “Kisas algun di nos coleganan si sa kico ta na caminda y nan ta sali defende e aumento di impuestonan aki, pero en todo caso Parlamento den su totalidad ni tampoco pueblo of comercio sa kico ta spera nan e aña aki.”
Parlamentario Arends ta sigui bisa cu un gobierno nobo no ta hereda nada. Tur partido ta bay eleccion cu conocemento di causa, caminda nan convence pueblo cu nan lo por hasi’e mihor cu e gobierno na mando. Dus djies tira culpa riba ‘herencia di gobierno anterior’, manera nos a bin ta wak den diferente tereno, ta un excusa mediocre y facil pa asina sconde e falta di conocemento di materia, capacidad pa hiba un maneho y abilidad pa goberna un pais.