Miembro di fraccion di AVP, Robert Cadenlaria diahuebs mainda para na Cancha deportivo Ovio Orman, a mustra cu nan kier pone lus riba e contraste cu ta existi entre e gobierno anterior di gabinete Mike Eman I y II y e gabinete actual di Evelyn Wever Croes.
Sr Candelaria a mustra cu na e Cancha deportivo Ovio Orman por mira un ehempel con un gobierno a traha cu vision riba infrasructura den un bario, camidna no solamente e gobierno a drecha e bario aki den Madiki kavel, pero a drecha hopi otro bario mas, mes cos cu esun aki.
“Ora nos papia di drecha un bario nos ta referi aki na hopi mas trabounan cu a wordo haci cu djis pone baksteen den bario, manera sa wordo bisa. Ora nos papia di drecha un bario, nos ta papiando aki di un maneho integral cu gobierno anterior a hiba pa 8 aña.
Cu drecha un bario, mi ta referi na drecha e infrastructura den e bario, pone lus den e bario pero tambe atende otro areanan, manera crea espacio pa recreacion pa e habitantenan.
Sinembargo e no ta yega na e partinan aki so di adelanto den infrastructura y embeyecimento di e bario, ya cu drecha e bario ta incera tambe pa drecha e nivel di bida di esunnan cu ta biba y move den un bario. Ehempelnan di esaki entre otro ta ora cu gobierno di AVP a subi onderstand cu 25% pa esunnan cu ta biba den nos barionan cu tabatin mester di esaki. E ta incera tambe cu a drecha forsa di compra pa esunnan cu ta biba den nos barionan.
Ehempel di esaki ta un aumento di Afl 250.00 pa aña pa famianan cu ta den onderstand pa yuda cubri nan gastonan di scol. E adelantonan aki no ta bin di nan mes pero nan ta rekeri vision.
Na e momentonan aki nos pais ta goberna pa un gobierno cu no tin ningun otro vision cu ta pa drecha cos pa nan mes hendenan caminda nan famianan ta haña trabou links y rechts siendo cu nan mester ta bahando nan gastonan di personal di gobierno.
Gabinete Wever Croes ta pasa medida tras di medida y tur biaha cu pone dede riba nan mal maneho, nan ta keda culpa e gobierno anterior pa tur cos. E disco ey a raya caba.
Tur loke ta malo den nan bista, ta nan supuesto herencia, y tur loke e gobierno anterior a laga atras cu ta bon, nan ta claim pa nan mes y ta gaba cune. Esey ta pasa ora bo drenta gobierno djis pa drenta. Esey ta pasa ora bo drenta gobierno pa yuda bo mes na luga di drenta pa yuda pueblo. Ta nos trabou den Parlamento pa keda vigila con e gobierno ta operando y gobernando e pueblo. Nos mester wak con ta maneha e recursonan di pueblo y trece esaki pa dilanti.
Nos mester ta e wowo y orea di pueblo,” Parlamentario Robert Candelaria a declara.