Home Entertainment Na beneficio di Teatro di Ser’i Noka y scol Cacique Macuarima… Concierto...

Na beneficio di Teatro di Ser’i Noka y scol Cacique Macuarima… Concierto “Give Love a chance” 14 di februari proximo!

SHARE


 

Cu hopi entusiasmo Edjean Semeleer a anuncia un anochi special y unico den cual e hunto cu artistanan Chris Kross y Rocco Franken lo deleita nan publico cu bon musica y un cena magnifico riba diabierna 14 di februari proximo. Cu actuacion special di musiconan Angelo Kock y Christopher Rodulfo, esaki lo ta sigur un anochi magico den cual amor y amistad lo wordo celebra.

E proyecto aki ta wordo presenta na beneficio di e esfuerzo di restauracion di e Teatro di Ser’i Noka, pero tambe pa brinda ayudo financiero y sosten na e esfuerzonan di Scol Cacique Macuarima pa restauracion di nan localnan cu a wordo destrui.
Scol Cacique Macuarima a expresa gratitud inmenso na e hecho cu nos artistanan local tambe ta uni nan mes na e esfuerzonan pa asisti nan den e hazaña importante di restaura nan localnan cu ta den necesidad urgente di esaki.

E cena special di dia 14 di februari proximo cu lo wordo combina cu un recital musical presenta pa Edjean y Chris Kross lo cuminsa pa 7’or di anochi den e parke encantador di Ser’i Noka y lo dura te cu 9’or.
Esnan cu forma parti di e cena aki lo disfruta tambe di un cocktail di bonbini, un “all-you-can-eat dinner buffet” cu un variacion amplio di cuminda delicioso, postre, soft drinks y biña durante henter e cena.
Despues di esaki, e publico tin e posibilidad di pasa pa e teatro di Ser’i Noka, caminda un otro concierto special lo wordo presenta door di tur e artistanan aki, cuminsando pa 9.30 pm.

Pues un pakete sumamente atractivo cu na mes momento ta sigura bienestar di un teatro historico y tambe di un scol basico. E prijs pa e pakete aki ta unicamente Afl. 150.00 pa persona.
Carchinan pa e pakete aki ta obtenibel na oficina di Go Cultura Foundation, situa na John G. Emanstraat 24 of na telefon 5830808.

Esnan cu ta desea di atende solamente e concierto cu ta cuminsa 9.30 pm, tambe ta bonbini. Prijs di e carchi aki ta solamente afl. 35.00 y ta obtenibel pronto na Fantastic Gardens na Bushiri y Chocoglam na Boegoeroei.
Bo ta cordialmente invita pa sea cu bo pareha, bo famia of amigonan celebra amor y amistad, comparti bondad y “Give Love a chance” door di aporta na un causa noble y importante: restauracion di nos Teatro di Ser’i Noka y restauracion di localnan di Scol Cacique Macuarima. Ambos, na beneficio di nos futuro generacionnan cu merece lo mihor.