Definitivamente Minister di Inhusticia Andin Bikker ta mustra cu e no ta bibando e realidad di pueblo, cu no ta sinti mescos cu pueblo ta sinti, caminda menasa di atraco, menasa di ladronicia ta birando un custumber di tur dia.
Arthur Dowers di fraccion di AVP ta mustra cu ya caba algun siman atras a mustra cu Minister Bikker ta duna e impresion cu e no ta gobernando aki na Aruba pero den un otro pais y awor for di su propio boca, e minister di inhusticia aki ta confirma cu realmente e no por sigura seguridad di pueblo.
“Tin un dicha ta bisa cu e miho palabranan c’un persona por bisa tin ora, ta simplemente ni bisa nada pero cu Minister Andin Bikker esaki ta net lo contrario.
Ya caba nos a bin ta mustra cu Minister Bikker awendia no ta corda kico Parlamentaro Andin Bikker a bisa den pasado, ora cu el a pidi retiro di mi persona como Minister di Husticia asina c’un caso di atraco tuma luga.
Ta hopi curashi minister aki tabatin e siman aki ora cu el a duna un declaracion bisando cu atraconan a baha compara cu añanan cu a pasa y pa colmo ta sigura pueblo cu ‘atraconan ta de vez en cuando,’ loke pueblo no kier a scucha.
Minister Bikker aki na momento di drenta gobierno, a sigura cu e lo elimina criminalidad aki na Aruba, cu e lo pone camaranan, cu e lo busca helikopter cu por practicamente mira tur caminda y ultimo el a bisa cu e lo bin cu drones pa bula rond pa duna pueblo trankilidad.
Awor buscando un forma pa hustifica su fracaso y incapacidad, segun Andin Bikker, pueblo mester ta trankilo ya cu tin menos atraco compara cu cifranan di añanan anterior, un expresion simplemente cu ta confirma su incapacidad pa brinda pueblo e proteccion cu pueblo ta buscando.
Tin atraco tira nos hendenan cu ta cana riba caya, den casnan di famia, atraco riba turistanan, atraco den negoshinan na hotelnan renombra, atraco den cas di comerciantenan, atraco den supermercado pero segun Andin Bikker ta de vez en cuando esakinan ta pasa.
Pa colmo na momento cu e Minister di Inhusticia aki ta sinta ta bisa pueblo cu no tin atraco na Aruba, tras di su lomba apenas un pa dos caya eytras, atracadonan tabata activo pero mientras cu tur hende sa di esey, Minister Bikker ta hunga di no sa nada.
Cu otro palabra Bikker ta indicando aki probablemente cu e no ta mira necesidad pa su gobierno haci algo, pa su gobierno lanta para y duna pueblo mas proteccion, ya cu segun su concepto e solo hecho cu cifranan ta mustra cu tin menos atraco cu añanan anterior, esey mester ta e trankilidad cu pueblo mester biba cune.
Sinembargo den un pais cu tin un gobierno drechi, cualkier tipo di atraco, cualkier tipo di acto criminal contra nos comunidad, ta un atraco y acto di mas y ta deber y obligacion di Minister Bikker pa e brinda pueblo e siguransa aki, brinda pueblo e trankilidad cu e tin derecho riba dje.
Practicamente tur dia tin casonan di kiebro y ladronicia ta tumando luga den practicamente tur bario rond Aruba, caminda nos ciudadanonan no por biba trankilo mas, principalmente nos hendenan grandi cu ta bibando nan so.
Antisocialnan ta loer tur caminda, ta contempla ora cu ciudadanonan sali for di nan cas pa asina drenta y horta nan propiedadnan pero Minister Bikker no ta na altura di e berdad tristo di pueblo aki y sin duda ta na su luga pa Minister Bikker cumpli cu su propio pensamento, esta di haci loke Parlamentario Bikker a bisa algun aña atras despues di tur caso di atraco cu tuma luga, esta Minister Bikker retira for di bo cargo y permiti un otro asumi e responsabilidad aki pa asina pueblo haya solucion pa su problema serio di criminalidad,” Parlamentario Arthur Dowers a declara.