Home Sports Riba invitacion di KNVB Aruba ta participa cu 6 coach den...

Riba invitacion di KNVB Aruba ta participa cu 6 coach den curso elite na Corsou

SHARE

 

 

ORANJESTAD, Aruba –  Arubaanse Voetbal Bond (AVB) a ricibi un invitacion di Koninklijke Nederlandse Voetbalbond (KNVB) pa un curso elite special pa coachnan di seleccion, cu ta tuma luga na Corsou. AVB a manda 6 coach, cu lo ricibi guia y entrenamiento special.

 

KNVB ta brinda e curso aki uzando expertonan Piet de Jong y Johan Neeskens, kendenan ta coachnan hopi conoci y cu un trayectoria largo. E curso aki ta pa coachnan elite di Boneiro, Corsou, St. Maarten y Aruba. Coachnan cu ta atende cu seleccion di e paisnan. E coachnan di Aruba cu ta participa na e curso aki ta Glen Sambo, Elvis Albertus, Ronald Gomes, Marvic Bermudez, Leo Garcia y David Abdul.

 

David Abdul, coordinador di AVB, a indica cu algun punto cu nan ta bay siña ta con pa analisa wega, tocante scouting, e parti fisico, parti tactica y hopi mas. E curso ta hopi grandi y interesante.

 

Pa 10 dia largo e coachnan lo ricibi e curso aki. Normalmente un curso ta dura 2 pa 3 dia. Mirando e programa con esaki ta hinca den otro, e ta uno hopi intensivo. Nan lo ricibi e curso desde 8:00am te cu 10:00pm.

 

Di e forma aki AVB ta sigui aporta na miho preparacion y educacion di nos entrenadonan local. Por mira claramente cu e contactonan y bon relacion internacional cu partnernan di AVB ta traduci nan mes den oportunidadnan unico pa nos futbol local.